Владата на денешната трета седница донела одлука да започне постапката за санација на штетите од поплавите во тетовскиот регион, соопштија од службата за односи со јавност на владата. Како што велат во соопштението, увидот на терен веќе бил направен.
„Формирани се комисии од страна на министерствата за транспорт и врски, за земјоделство шумарство и водостопанство и за животна средина, коишто во соработка со Дирекцијата за заштита и спасување и општината Тетово во изминатото деноноќие веќе ги констатираа состојбите на теренот, по што е свикана веднаш вечерва владина седница за побрзо да се интервенира и да се помогне на луѓето кои се засегнати од последиците од временските неприлики. Добивме информација дека постои нанос од песок и земја од околу 70.000 метри кубни, на регионалниот пат Тетово – Јажинце, кај Порој, што е неопходно брзо да биде исчистен. За таа цел задолжени се Дирекцијата за заштита и спасување и општината Тетово веднаш да започнат постапка за расчистување на наносот на овој фреквентен и потребен пат за жителите од овој регион, во што Владата препорача да помогне и АРМ“, пишува во соопштението на Владата.
Од таму додаваат дека Министерството за земјоделство, шумарство и водостопанство да започне постапка за прибирање барања од земјоделците за надомест на штети. По ова надлежни комисии ќе излезат на терен и ќе направат увид на штетите и висината на средствата за обесштетување на земјоделците.