Болните од Психијатриската болницата во Бардовци кои седум години се раселени од зградата каде што престојувале, за три месеци ќе можат да се сместат во новата зграда чија изградба беше стопирана во декември минатата година.
Причина за стопирање на изградбата беше затоа што Министерството за здравство во време на екс министерот Тодоров одбило да и плати на фирмата Ингра АД Загреб која вршела реконструкција на објектот, поради што тие го тужеа Министерството и бараа да им се исплати долгот од 900 000 евра.
Откако НОВА ја објави сторијата Министерството за здравство одлучило да го исплати долгот, а фирмата се обврзала во рок од три месеца да го пушти објектот во употреба.
Од Ингра АД Загреб за НОВА потвдрија дека веднаш по склучување на Анекс договорот за градење и по исплатата на парите, тие ги повлекле тужбите со што се прекинати сите судски постапки против Министерството за здравство.
Како што веќе објави НОВА поради незаинтересираност на поранешното раководство во Министерството за здравство кое не ги плаќало сметките кон изведувачот “Ингра“ АД од Загреб, реконструкцијата на објектот се развлекла со години за во декември минатата работата да биде стопирана.
Како што неофицијално дознава НОВА, Проектната единица која е под Министерството за здравство извршила пренамена на овие средства. По брза интервенција сега парите биле пронајдени и дадени за тоа што се наменети.
Инаку, голготата на околу 70 пациенти од четвртото и петтото машко одделение трае седум години, период во кој тие живеат раселени по други одделенија и егзистираат во несоодветни услови, во соби кои што се пренатрупани со болни.
Овие болни се во многу тешка здравствена состојба и живеат зад решетки во болницата каде најчесто остануваат до крајот на животот.
Инаку, реконструкцијата на првото, четвртото и петто машко одделение е реализирано со кредит од Централна Европската Банка. Доколку до крајот на годината не завршеше изградбата на овој објект ќе пропаднеа парите добиени од ЦЕБ.