Два нови случаи на мали сипаници се регистрирани во последната недела, што бројот на заболени се зголеми на 19 луѓе од почетокот на епидемијата, во средината на септември до сега.
„Десет од заболените се од населба Маџари-Кванташка депонија, две лица се од Чаир, а по едно лице е регистрирано од село Кондово, општините Шуто Оризари, Кисела Вода и Бутел. Двајца заболени се од Прилеп и Струга, но привремено престојуваат и работат во Скопје. Едно од пријавените заболени лица е странски државјанин кое живее во Липљан, Косово“, информираат од Секторот за контрола и превенција во ИЈЗ.
Вонредната вакцинација очигледно не ги даде саканите резултати бидејќи епидемијата не е запрена.
Од тие причини, но и за да се утврди кој генотип на вирус е позитивните примероци на 30 октомври ќе бидат испратени до референтна лабораторија во Луксембург, за потврда и генотипизација, информираат од Институтот за јавно здравје. Од таму велат дека присуството на осетлива популација овозможува лесна преносливост и циркулација на малите сипаници меѓу населението.
Според податоците од ИЈЗ, дури 73,7 проценти од заболените годинава не биле вакцинирани со МРП, a најголем број од заболените припаѓаат на најмалите возрасни групи до 4 годишна возраст. Од секторот за контрола и превенција во ИЈЗ велат дека засилените активности на тимовите за вакцинација во изнаоѓање на лица кои не се вакцинирани резултирале со вакцинација со прва доза МРП на помалку од 1000 деца, што како што велат, тоа не е доволно за јакнење на колективниот имунитет кој би спречил понатамошно ширење на појавата на нови случаи со мали сипаници.
Стручњаците велат дека загрижува фактот што интересот за вакцинација континуирано опаѓа низ години. Од земја каде што опфатот со вакцинацијата изнесуваше 95 проценти, во последните две години има значителен пад на опфатот на 88,8 проценти и 82,1 процент. Најголем дел од не вакцинираните деца се од Скопје, каде што опфатот со вакцинација изнесува само 67 проценти. Надлежните информираат дека според последните информации 7764 деца кои подлежат на редовна вакцинација со прва доза против морбили останале невакцинирани. Епидемиолозите препорачуваат заштита и на медицинскиот персонал за да се спречи ширењето на болеста.
„Појавата на случаи на мали сипаници кај здравствени работници и лица кои работат во здравствени установи ги става овие лица во ризична група, а воедно придонесува и за понатамошна трансмисија на заболувањето. Фактот што сите се вакцинирани барем со една доза вакцина ја наметнува потребата од задолжително вакцинирање со две дози МРП, спроведување на личните заштитни мерки и зајакнати санитарно –хигиенски мерки во здравствените установи во кои се лекуваат заболените од мали сипаници, со цел спречување на интерхоспитални инфекции“, велат во Институтот за јавно здравје.
Од таму препорачуваат да се продолжи со засилениот епидемиолошки надзор, пријавување и контрола, хоспитализација и изолација на заболените со потешка клиничка слика, а на заболените со лесна клиничка слика да се препорача изолација во домашни услови. Задолжителна проверка и пронаоѓање на невакцинирани деца и нивно вакцинирање.
Матични лекари, педијатари, инфектолози и другиот медицински персонал да го проверат својот вакцинален статус. Доколку не постојат податоци за вакцинација против мали сипаници или доказ за прележана болест, потребно е комплетно да се вакцинираат со две доза на МРП вакцина (на растојание од еден месец). Доколку се вакцинирани само со една доза, потребно е да се вакцинираат и со втора доза на МРП вакцина, препорачуваат во секторот за контрола и превенција во ИЈЗ.