Комерцијална банка, Силк роуд (поранешна Алфа банка) и А.Д. Стопанска банка како банки најголеми доверители на ФЕНИ Индустри Кавадарци, денеска дале предлог до надлежниот суд за отворање на стечајна постапка „во најкраток можен рок, со продолжување на активностите на ФЕНИ индустри, за да се изврши реорганизација и да се изнајде сериозен инвеститор кој што ќе може да ги преземе и сервисира обврските на ФЕНИ индустри кон вработените, банките и другите доверители“. Ова беше кажано на денешниот брифинг во Владата помеѓу банките и вицепремиерот за економски прашања Кочо Анѓушев.
Генералниот директор на Комерцијална банка, Хари Костов, информираше дека долговите на ФЕНИ кон банките кредитори изнесуваат 40 милиони евра, додека 20 милиони евра компанијата им должи на други доверители како локалните транспортери, добавувачи итн.
Костов истакна дека во нивен интерес не е затворање на ФЕНИ, туку отворањето на стечај ќе значи ангажман за итно наоѓање на инвеститор кој што ќе може да ја продолжи работата на компанијата и да ги исплати долговите кон доверителите.
Во прилог на тврдењето дека продолжување на работата на компанијата е и нивен приоритет Костов го посочи фактот дека тие обезбедиле македонска компанија која што деновиве дала позајмица на ФЕНИ, чии што сметки се празни, за да се исплати плата на вработените, кои според Костов не би требало да страдаат во процесот.
Претставниците на банките обвинија дека раководството на ФЕНИ, кое досега го претставуваше инвеститорот „Кунико“ не настапило искрено во процесот на изнаоѓање на решение за состојбата на компанијата. Во однос на според нив шпелкулациите кои се појавиле во медиумите дека Кумико нашле нов инвеститор „Ене код“, Костов рече дека тоа не е точно, за што потврда е и денешната состојба во Централниот регистар во кој што не постојат никакви промени во сопственичката структура, но посочи други примери кои според него укажуваат на неверодостојни искази за време на преговорите во кои сите страни се труделе да најдат решение за судбината на ФЕНИ.
– Ние немаме ништо против „Ене код“ да ја преземе ФЕНИ , но според начинот на кој досега постапуваа, се сомневаме дека „Ене код“ е компанија која што има капацитет даги преземе обврските – рече Костов.
Костов и Анѓушев информираа дека во ФЕНИ биле пратени инспекции за да го проверат финансиското и материјалното работење на компанијата.
– Тие не поднеле ниту завршна сметка, што е ззаконска обврска на секоја фирма во земјава, има констатирано и многу неправилности во работењето за кои се одговара пред законот, а во фирмата со години не влегла никаква инспекција – рече вицепремиерот Анѓушев и нагласи дека тој нема да навлегува во наодите на надлежните инспекции бидејќи тоа е работа на надлежните институции и органите на правдата.
Анѓушев исто така рече дека не е негова работа да се меша во овие постапки, но тие како Влада се овде со цел да помогнат да се изнајде решение, поради фактот дека од работата на ФЕНИ зависат илјадници семејства од југоисточна Македонија, но и дека фероникелот е сеуште суровина која добро котира на берзите и оваа компанија има идниниа и зазема важно место во македонската економија.
Анѓушев додаде дека на состанокот биле поканети и претставници на инвеститорот „Кунико“, но тие не можат да бидат лоцирани, а нивните мобилни телефони се исклучени.