Поранешниот министер за здравство од ВМРО-ДПМНЕ, Никола Тодоров денеска основа адвокатска канцеларија, потврди Тодоров за НОВА ТВ.
Канцеларијата на идниот адвокат ќе се наоѓа во населбата Капиштец.
Во мај оваа година, откако новите министри од владата на СДСМ ги презедоа функциите, Тодоров кој беше избран за пратеник, на својот профил на социјалната мрежа најави дека ќе се повлече од пратеничкото место и ќе се посвети на својата примарна професија како адвокат.
„Имајќи предвид дека планирам во иднина повеќе да се посветам на мојата основна професија како адвокат, како и да можам да дадам поголем придонес во партиските активности, дозволете ми да Ве информирам дека одлучив да поднесам оставка на функцијата пратеник во Собранието на Република Македонија“, напиша Тодоров.
Бил приправник на истражен судија во Основниот суд Скопје 1 во септември 2002 и тоа е се од правосудството. На 27 години влегува во политиката и почнува да реди функции. Со доаѓањето на власт на ВМРО-ДПМНЕ, од 2006 до 2007 е заменик директор на ЈП за стопанисување со станбен и деловен простор. Кусо време е раководител во скопскиот Катастар, а во јули 2009 седнува во министерската фотелја во образованието и таму останува до јули 2011. Последна политичка функција на Тодоров е министер за здравство каде што остана до последниот ден од владата на ВМРО-ДПМНЕ.
Инаку Тодоров е еден од министрите од владата на Груевски за кого граѓаните во текот на годините бараа оставка. Поради бројните смртни случаи, Тодоров го доби надимакот „министер за смрт“.
Смртта на деветгодишната Тамара Димовска од Велес, која имаше искривување на рбетот, е еден од кобните случаи за кои граѓаните го обвинуваат Тодоров. Битката за спас на девојчето со надлежните институции траеше со месеци месеци. Тамара не издржа во правната процедура и почина чекајќи потпис од лекарите.
Со Тодоров како министер за здравство се врзува и скандалот со тендерот за набавка на рендген и дигитални апарати во вредност од 1 милион евра, што го доби фирмата „Визарис МКД“, чиј сопственик беше мајката на новинарката од телевизијата Сител, Ивона Талевска.
Последните денови од неговото министерување, Тодоров го потпиша договорот за изградба на нов Клинички центар во вредност од 72 милиони евра.
Тодоров е член на Извршниот комитет на ВМРО-ДПМНЕ, неколку циклуси беше шеф на изборниот штаб на партијата и лојален на лидерот, Никола Груевски.