И покрај обвинувањата од страна на Владата, дека градоначалникот на општина Центар доцни со ревизија за сработеното, Андреј Жерновски на денешниот отчет за работата на градоначалникот и Советот, напомена дека речиси 98 отсто од ветувањата во предизборната кампања се реализирани или се почнати со реализација.
„Ова се тенденциозни напади. Забораваат дека во Центар имаше 3 изборни круга на гласање. Јас нема да внесувам политика во општината, а работам и ќе работам, а тоа го покажува и отчетот од кој јасно се гледа дека се што беше во изборната програма е 98 проценти реализирано или започнато“, изјави Жерновски.
Жерновски потсети дека општината ја презел со испразнет буџет и долг од 5, 5 милиони евра, и дека секој втор работен ден се справувал со инспекции.
„Проектот Скопје 2014 не го подржувам, но јасно кажав и ќе повторам, нема да уривам. Позади грандиозните изданија од Скопје 2014 се кријат илјадници нерешени животни прашања. Општината беше 13 години киднапирана од власта и ние ја враќаме на граѓаните“, рече градоначалникот на о.Центар.
Тој истакна дека е горд на сработеното, а напомена некои од сработените планирани задачи: Од 1 јули центарци добија бесплатен паркинг, започнатиот процес на гасификацијата на општината, завршената реконструкцијата или оние кои се во тек, улиците: „Пајак“, „Роса Плавева“, „8-март“, „Питу Гули“, „Благоја Давков“ и „Ѓорѓи Пулевски“, новоотворената општинска библиотека-читалната Славко Јаневски.
Жерновски ги повика советниците од редовите на ВМРО-ДПМНЕ да се изјаснат зошто го изгласале ДУП-от со кој се предвидува барокна зграда во паркот кај Бристол, и упати барање до нив да одговорат дали ќе работат за интересите на граѓаните или за, како што вели, политиката на владејачката партија.
Тој им вети на граѓаните дека нема никогаш да одобри одлуки за менување на ДУП-от без нивна согласност.