Владата на Република Македонија е посветена на решавање на спорот кој Република Грција го има со уставното име на Република Македонија – пишува во владиното соопштение испратено до јавноста вечерва.
Активно се создаваат услови за придвижување на процесот напред, а исходот ќе зависи од подготвеноста за компромис на двете страни, имајќи ги предвид разликите.
Остава добар впечаток обновената комуникација, која отвора простор за пријателски пристап и градење обострана доверба.
По внимателна анализа на рамката на Нимиц што денеска ја презентирал пред преговарачите во Њујорк, согласно значењето на прашањето за државните интереси, ќе продолжи процесот за градење на што е можно поширок и поинклузивен став од страна на Република Македонија.
Македонскиот претставник во разговорите за името, амбасадорот Васко Наумовски по последната рунда разговори во Њујорк вечерва изјави дека предлозите изнесени од медијаторот Метју Нимиц се далеку од достоинствено решение.
Наумовски изјавата ја даде пред да ја информира Владата на Република Македонија за предлогот од Нимиц со што се отстапува од досегашната практика ставот околу предлогот да биде изграден откако сите релевантни фактори во државата ќе бидат информирани за содржината – дознава Нова ТВ од дипломатски извори.
Според него, рамката за разговорите е дадена во Резолуцијата 817 на Советот за безбедност, а тоа е да се надмине разликата околу името. Ниту една држава, посочи, нема право да и наметне на друга држава некакво ново име, ниту пак ОН имаат право да наметнат ново име на нејзина држава членка.
– Нашата држава има име, тоа е Република Македонија, името што е во основата на нашиот идентитет. Исто така, денес во 2018 година никој не може да го негира постоењето на македонскиот народ и македонскиот јазик. Од страна на медијаторот денеска беа презентирани некои идеи за коишто сметам дека излегуваат од оваа рамка и дека се далеку од едно достоинствено решение, но, сепак, овие предлози ќе бидат презентирани пред државно-политичкиот врв и истиот ќе може да заземе став по ова прашање, рече Наумовски во изјава за известувачот на ТВ Сител.