Очевидци тврдат дека во џамијата Ал Фатах, во која во текот на ноќта пукаа сигурносните сили (војската и полицијата) се наоѓаат околу 700 луѓе, јавува Ал Џезира.
Освен силите за безбедност околу опколената џамија се наоѓаат и платеници, јавува репортерот на Ал Џезира од Каиро.
Уапсени се неколку демонстранти во обид да излезат од џамијата, кои се однесени на распит.
Безбедносните сили фрлале и солзавец внатре во џамијата, потврдуваат медицински извори. На снимките луѓето носат гас-маски.
Организацијата за заштита на човековите права Амнести интернешенел побара денеска целосна и непристрасна меѓународна истрага за крвопролевањата во Египет, предупредувајќи на несразмерна сила на власта против демонстрантите.
Организацијата, со седиште во Лондон, исто така апелираше на експертите на ОН да им се овозможи да го истражат насилното сузбивање протести.
Најмалку 173 лица биле убиени вчера во Египет, а ранети биле 1.330 лица.