Новиот Универзитетски клинички центар треба да се гради на нова локација во Општина Карпош за која постои урбанистички план уште од 2001 година. За дислокацијата на Клиничкиот центар во 2010 е направена физибилити студија од Француска консултантска куќа со поддршка од Европската инвестициона банка, како и искуствата од Папскиот универзитетски клинички центар во Рим – „Policlinico Agostino Gemalli“, тврдат од Асоцијацијата на архитектите на Македонија.
Архитектите предупредуваат дека сегашната локација каде што е комплексот клиники не само што ќе доведе до колапс на улицата Водњанска, туку ќе ја загрози животната средина од издувните гасови на возилата од што просторот ќе умре. Од ААМ бараат Владата да го ревидира проектот и да побараат стручно мислење од архитектите, не само за овој поект, туку и за сите останати кои се однесуваат на урбаното планирање на градот.
На прес конференција денеска го презентираа проектот на новиот Универзитетски клинички центар кој како што образложија треба да се гради на локација на север од Злокуќани и на југ од железничката пруга Скопје-Кичево. Планирано е Универзитетскиот клинички центар да има најмалку осум влеза, да е добро инфраструктурно поврзан поради близината на северната обиколница и пристап за западниот и источниот дел на Македонија, но и лесен и брз пристап за граѓаните на Скопје, можност за изградба на автобуски и железнички терминал, хелиодром и сите мерки за заштита и спасување.
„Оваа локација е во близина на централното подрачје, има сообраќајна проточност, можност за брз пристап на возилата и брзата помош, има железница, пристап по воздушен пат со хелиодром, ќе има чиста еколошка средина, водоснабдување преку Лепенец. Површината е четирикратно зголемена и изнесува 94 хектари, а просторот каде што е сега сегашниот Клинички центар е 20 хектари“, сметаат од Асоцијацијата на архитектите на РМ.
Од ААМ потенцираат дека изградбата на новиот Универзитетски клинички центар кој ќе биде со многу богати содржини е процес кој што ќе трае во наредните 10 до 15 години, но затоа пак ќе биде трајно решение.
„Овој простор има можност за развој. Доколку се избере старата локација штетата ќе биде многу поголема од 5,5 милиони евра оштета што треба да се плаќа кон Банката на Советот на Европа. Како архитекти, ние мора да гледаме напред и да имаме визија да предвидиме работи, а не да го решиме проблемот сега и да го закрпиме да држи три години. Изградбата и дислокацијата би бил процес од 10-15 години, најпрво со селење на клиниките кои функционираат самостојно, како Стоматолошката, а на крајот Хирургијата“, изјави Мартин Пановски претседател на ААМ.
Според Иван Арсовски, на проблемот со локацијата треба да се гледа комплексно и да се опфати околината, посочувајќи дека со новата планирана населба Сопиште со Сончев град ќе има потенцијални 17.000 жители за кои главна сообраќајница до центарот ќе биде улицата Мајка Тереза, поранешна Водњанска.
„Тоа ќе предизвика не сообраќаен колапс, туку сообраќаен инфаркт. Пет илјади возила ќе пробаат да влезат во Клинички центар и ќе го попречат движењето на специјалните возила, корисниците на околните населби, но и на возилата со придружба од Претседателската вила, резиденциите и амбасадите, што значи дека и од безбедносен аспект не е поволна локација“, рече Арсовски.
Покрај зголемениот простор, кој предвидува и изградба на нови болници и факултети и поголем капацитет за хоспитализација, бенефитот го гледаат и во тоа што тој дел од Скопје е во здрава и незагадена животна средина. Сето тоа, сметаат архитектите, ќе ги подобри условите за работа на докторите и стандардите за лекување на пациентите кои ќе добијат брза и квалитетна здравствена услуга.