Случајот кој ја разбрани јавноста со абортусот на 13-годишната Ромка од домот „25 Мај“ која била силувана, е во рацете на Министерството за внатрешни работи.
По соопштението на Европскиот центар за правата на Ромите, од Министерството за труд и социјална политика, брифираат дека девојчето зад себе има повеќе трагични случаи.
Р.И, 13-годишна, од своите родители не била насилно одземена, туку затоа што службите утврдиле дека таа била принудена да питачи, а ако се погледне историјата на нејзиното семејство, другите деца од тоа семејство починале од употреба на дрога.
Откако е одземена од семејството, Р.И од 2011 година до 2016 година била сместена во пет различни згрижувачки семејства, но бидејќи не успева да се адаптира, на крај завршува во „25 Мај“ каде што и бил назначен старател.
МТСП тврди дека за посочената малолетничка имало посебна грижа, но тоа не дало никакви резултати.
Секој пат кога девојчето го снемувало од Домот, старателот пријавувал во МВР.
Оттаму неколку пати побегнало и било во различни градови. И нејзините искази пред полицијата, според МТСП, се проблематични во напорите да ја заштитат бидејќи прво тврдела дека била заљубена, а потоа и дека била експлоатирана, нелегално да работи како сексуална работничка.
Пред полицијата, Р.И исто така посочила и лица со имиња и презимиња.
По одредено време, била сместена во Центарот за заштита од трговија со луѓе, но поради недоволните докази, таа повторно била вратена во домот „25 Мај“.
Од Министерството за труд и социјална политика велат денес или утре, девојчето повторно ќе го сместат во Центарот за заштита, а во меѓувреме се надеваат дека МВР ќе спроведе ефикасна истрага за нејзините тврдења.
Сепак, од Министерството негираат дека таа била жртва и на социјален работник.
МТСП информира за овој случај, по вчерашната реакција на Европскиот центар за правата на Ромите, каде што наведоа дека девојчето било принудно земано од постар маж вработен во институцијата, а потоа ја носел во друг град каде била силувана.
МВР најави детали во текот на денот.