Министерството за здравство ги истражува индициите дека постоеле злоупотреби со исплатата на хонорарите на Клиниката за детска хирургија во Скопје. Во наредниот период, Министерството ќе утврди кој и врз основа на што, на лицата ангажирани со договор на дело, им исплаќал суми многу поголеми од предвидените.
„Имајќи го ова во предвид, потенцираме дека не станува збор за намалување на примањата на хонорарците, ангажирани на Клиниката, туку за враќање на износите во рамки на постојната систематизација“, се вели во соопштението од Министерството за здравство.
НОВА дознава дека на почетокот на наредната недела на Клиниката ќе има ревизија од ФЗОМ, како и државна ревизија. Тие треба да утврдат како се трошеле парите од буџетот, што се правело со хонорарите на 25 лица ангажирани преку договор на дело, зошто биле многу повисоки од систематизацијата.
Минатата недела од оставка си даде и новоназначениот директор Лазар Тодоровиќ, но министерот Филипче не ја прифати неговата оставка. Тој ги намали хонорарите на овие лица, по што се крена голема прашина во јавноста.
„Оставката ја дадов само поради неразбирање од медицинскиот тим на Клиниката, не заради намалување на хонорарите“, изјави за НОВА, Тодоровиќ.
Неофицијално, на детска хирургија има многу контраверзии околу работењето на претходниот директор и како се трошеле парите од буџетот на клиниката. Тодоровиќ нагласи дека не знае за такво нешто, но за да биде начисто што се случувало ќе чека да утврдат ревизорите.
Од Министерството за здравство потенцираат дека останува на ветувањето од Програмата на Владата на Република Македонија за покачување на платите на сите здравствени работници, за 5 проценти, во втората половина од оваа година.
Дополнително, во првата половина на годинава ќе се зголеми сумата, која докторите и медицинските сестри ќе ја добиваат за дежурствата. На пример, минатата година еден интернист за дежурање во работен ден добивал по 1.340 денари, а годинава овој износ ќе се зголеми и ќе изнесува од 2.500 до 3.000 денари. Додека за дежурство на празник, или во тек на викенд, сумата од 2.980 ќе порасне на 4 илјади денари.