Новиот Клинички центар ќе се гради на нова локација во близина на Злокуќани на потегот кон Психијатриската болница во Бардовци. Старата локација во кругот на клиничкиот блок дефинитивно отпаѓа бидејќи не е најдоброто место за функционирање. Вака одлучи Владата по долги консултации и по разгледување на повеќе локации за избор на најдобро можно решение на овој капитален објект.
„ Местото каде што е сега Клиничкиот центар е угушено. На тоа место дури и со новиот проект немаше да се постигне добро сообраќајно решение. Немаше да има доволно паркинг места и улицата Водњанска и натаму ќе останеше тесно грло особено за граѓаните кои живеат во околината, а истовремено немаше да обезбеди добар пристап до болничката услуга. Новиот проект немаше да ни обезбеди модерен Клинички центар како во развиените земји.“, изјави министерот за здравство Венко Филипче на прес конференција во Владата.
Новиот Клинички центар ќе се гради на површина од 84 хектари и во него покрај големиот објект со сите клиники, предвидено е и Медицински факултет и кампус за студентите на медицина, како и истражувачки центар.
„Локацијата е во населбата Бардовци, многу блиску до Психијатриската болница. Се планира да се направат пристапни патишта. Ќе има пат кој ќе тргнува од населбата Карпош и ќе оди директно до Клиничкиот центар и се планира нова улица, тоа е продолжение на улицата Железничка, која ќе продолжи кон правец на Ѓорче Петров и ќе поминува точно каде што планираме да се смести овој објект. Ова го направивме во консултации со Асоцијацијата на архитекти, кои ни дадоа професионално и издржано решение“, изјави Филипче.
Тој нагласи дека ќе преговараат со Банката на советот на Европа за да се најде решение да не се плаќа оштета, но дури да се плати ова решение ќе излезе поисплатливо од претходното бидејќи го решава трајно проблемот. Со тоа отпаѓаат и сите потрошени пари за досегашниот проект, од кои само на проектанската куќа АРЕН СРЛ и беа исплатени 1,3 милиони евра. Изградбата е предвидена со урбанистичкиот план од 2012 година. Од Владата сметаат дека проценките се дека за 1 до 1, 5 година ќе бидат направени подготовките за изградба, а самиот објект да биде завршен за 4 до 5 години.
Градоначалникот на општина Карпош, Стефан Богоев рече дека земјиштето е комбинирано и државно и приватно и бидејќи веќе постои урбанистички план нема да има проблем.
„Има начин како тоа да се регулира. Со генералниот урбанистички план од 2012 година тука е предвидено простор за здравството и приватните сопственици нема да можат да градат“, рече Богоев.
Затоа време додека се гради новиот Клинички центар на местото на старата гинекологија каде што сега има дупка и кое беше предвидено за нов Клинички центар ќе никне монтажна гаража за да се реши проблемот со паркирање на возилата.
„Работиме и на подобрување на сообраќајното решение во Клиничкиот центар каде што е сега. Со градот Скопје веќе имаме изготвено едно решение за влез на возила, но и за проток на возилата. Ќе обезбедиме посебна лента за Брзата помош, на плацот за градба се надевам дека ќе успееме да изградиме и монтажна катна гаража за да се олесни протокот на возила“, рече Филипче.
Министерот Филипче најави дека во клиниките каде што е потребно ќе има мали корекции или реновирања за да им се овозможи подобри услови на пациентите и на медицинскиот персонал.