Матичните гинеколози се најскапо платените специјалисти во Македонија со просечна месечна исплата од 169 илјади денари по тим. Колку за споредба, тоа е повеќе од 55,500 денари отколку што Фондот исплаќа на општ матичен лекар. Вака ФЗОМ им одговори на Здружението на матични гинеколози кои денеска излегоа со писмо дека во иднина ќе издаваат само упати бидејќи нивните барања два месеца стојат во Фондот без да бидат разгледани.
Од ФЗОМ велат дека Фондот не претпочитаат комуникација преку медиумите со своите стратешки партнери, па поради тоа во најбрз можен рок планирале средба со Здружението на матични гинеколози, а одлуките ќе бидат јавно соопштени. Во соопштението се вели:
„Фондот за здравствено осигурување на Македонија сака да ја информира јавноста во врска со барањата на матичните гинеколози реафирмирани преку јавните гласила во Република Македонија.
Матичните гинеколози се важна карика во здравствениот систем бидејќи се грижат за репродуктивното здравје на жените, а водено се во помал број од предвидениот во Република Македонија. Фондот го препознава овој факт и поради истото континуирано одржува редовни средби со Здружението на приватни гинеколози на Република Македонија (ЗПГАМ).
Точно е дека пред два месеци беше последната средба, на која Здружението презентираше неколку барања, пред се од финансиски аспект.
Фондот секогаш ги носи своите одлуки во интерес на своите осигуренички, а пред се, во насока на обезбедување на квалитетна и навремена здравствена заштита, па така и овојпат, партнерски ги разгледува можностите за изедначување на капитациониот бод за матичните гинеколози со другите матични лекари. Н, ова предвидува нови финансиски средства.
Фондот не претпочита комуникација преку медиумите, со своите стратешки партнери, па поради тоа, сакаме да ја информираме јавноста дека во најбрз можен рок, е предвидена средба на менаџментот на Фондот со претставници на ЗПГАМ. Сите одлуки кои ќе бидат заеднички донесени ќе бидат навремено соопштени.
Колку за информација, треба да земеме предвид, дека матичните гинеколози се најскапо платените специјалисти во Репулбика Македонија, со просечна месечна исплата од 169 илјади денари по тим. Колку за споредба, тоа е повеќе од 55,500 денари отколку што Фондот исплаќа на општ матичен лекар“, се вели во одговорот на ФЗОМ.
Како што објави НОВА матичните гинеколози од ФЗОМ бараат пакет за здравствени услуги, зголемување на капитацијата, поделба на пациентките по возрасни групи и воведување на коефициенти за нив исто како и кај другите матични лекари, како и пакет на услуги(да се знае кои услуги ги бара ФЗОМ за таа капитација, во и вон бременост.
Ваквата одлука Управниот одбор на здружението ја донел поради притисокот од пациентките кои не сакаат да им се наплаќа за услуги кои се бесплатни, како и притисокот од медиумите и целокупната јавност.
Матичните гинеколози сметаат дека ФЗОМ својот игнорантски, деградирачки, арогантен, популистички и банкарско-лихварски однос постојано и систематски се обидува да го стивне гласот на добриот доктор, делувајќи како еден од позначајните фактори на страдање на докторската заедница.