Гинекологот кој лажеше пациентка дека е бремена доби 1,5 година затвор

1
By on АНАЛИЗА, ПОЛИТИКА

Николче Дамчевски, гинекологот кој девет месеци лажеше пациентка дека е бремена денеска е осуден на година и пол ефективна казна затвор, а изречена му е и забрана за вршење дејност во траење од осум години. Дамчевски пред судот ја призна вината и за двете дела, Несовесно лекување и Фалсификување на медицински документи.

Адвокатката на оштететената пациентка, Ирена Фрчкоска, за НОВА изјави дека не се задоволни од изречената казна и дека ќе се жалаат за висината.

„Не сме задоволни од изречената казна бидејќи со оваа висина на казната не е исполнета целта, а тоа е заштита на пациентките.  Случајот освен од етички апсект, особено е карактеристичен поради нехуманиот начин на кој е извршено кривичното дело, тоа е еден монструозен начин на кој е извршено што му дава поголема тежина на делото“, изјави за НОВА, адвокатката Фрчковска.

И од Основниот суд 1 ја потврдија пресудата.

„Во однос на предметот со К.бр 1918/17  на денешната јавна расправа врз основа на признане на вина на обвинетиот Н.Д. за кривичните дела Тешки дела против здравјето на луѓето и Фалсификување исправа Основниот суд Скопје 1 – Скопје донесе првостепена пресуда со која обвинетиот се огласува за виновен и се осудува на казна затвор од 1 година и 6 месеци затвор“, се вели во одговорот од Основен суд 1.

Сторијата за гинекологот Дамчевски кој девет месеци лажел пациентка дека е бремена ја објави НОВА. Тој  на пацинтката која долго време се обидувала да остане бремена и  презентирал состојба на лажна симулирана бременост и покажувал слики од ЕХО од друго бебе и пуштал да го слуша отчукувањето на срцето на бебето, а всушност и пуштал да го слуша нејзиното срце. Иако знаел дека не е бремена, вршел редовни контролни гинеколошки прегледи со ехо апарат, ја мерел должина и тежина на плодот, го утврдил полот на бебето, на секој преглед детално ја објаснувал секоја снимка и правел скрининзи со писмени извештаи во кои е наведено дека на ехото се гледа плод во различна гестациска недела, а потоа договорил и термин за пораѓање.

Непосредно пред денот за кога било договорено наводното пораѓање на пациентката, кога таа се појавила со торба подготвена за чинот на раѓање,  најпрвин на сопругот , а потоа и на оштетената ја открил вистината за лажната бременост.

По објавување на серијалот стории на НОВА за случајот со лажната бременост,  се јавија многу пациентки кои биле измамени, на кои не им биле издавани ниту фискални сметки за сите процедури кои им биле правени во текот на вештачкото оплодување. По ова ОЈО отвори истрага, а Лекарската комора му ја одзеде лиценцата за работа на седум години. По ова доби отказ од Клиниката за гинекологија, каде што беше дојден да работи од приватниот сектор.

Серијалот стории за гинекологот објавени на НОВА, годинава ја доби првата награда за најдобра истражувачка сторија на ЗНМ.

Share.