Документот – „нон пејпрот“ што беше објавен денес во медиумите, во кој се вели дека Европската унија треба за следната пролет да го одложи почетокот на преговорите за членство со Македонија и Албанија, не е изненадување во Брисел.
Дипломатски извори во Советот, каде се преговара и подготвува претстојниот Самит на ЕУ во јуни на кој ќе се одлучува за преговори со Македонија, за МИА велат дека ова е веќе позната позиција на Холандија и Франција и не претставува ништо ново. Во ЕУ има и други земји членки кои имаат поинаков став за Македонија.
– Ние сепак сметаме дека преговорите со Македонија треба да се спроведат доколку се реши спорот за името, така што овој документ не не’ загрижува многу, изјави дипломатски извор од западна земја членка на ЕУ за МИА.
Холандија и посебно Франција се познати по отпорот на нивната јавност кон проширувањето на ЕУ. За преговорите со Македонија, министрите за надворешни работи, амбасадорите, и шефовите на држави и влади на ЕУ ќе дебатираат во текот на овој месец. Клучен услов за старт на преговори е да се пронајде компромис за името со Грција.
Во „нон пејпрот“ пишува:
„За ПЈРМ, и покрај вистинските промени во општата атмосфера во земјата, извештајот не покажува јасен суштински напредок во спроведувањето на Итните реформски приоритети. Имплементацијата на новите судски реформи е штотуку започната и треба долгорочен напредок и континуирана промена во однесувањето. Неопходни се повеќе напори за да се обезбеди регрутација врз основа на заслуги и деполитицизација на јавната администрација (заробена држава). Борбата против корупцијата и организираниот криминал се уште не дале задоволувачки резултати: и покрај поставената правна и институционалната рамка, корупцијата преовладува во многу области и продолжува да биде сериозен проблем, додека пак капацитетот на институциите за ефективно да се справат со корупцијата има покажано структурни и оперативни недостатоци, меѓу кои е и политичкото мешање“, и се повикува тоа да се земе предвид, пред да се донесат какви било одлуки во врска со проширувањето.