Претседателот на Република Македонија, Ѓорѓе Иванов одржа обраќање до јавноста во кое соопшти дека нема намера да го потпише договорот кој Скопје и Атина го постигнаа.
-Текстот на договорот е поразителен за Република Македонија, не се менува само уставното име туку и преамбулата на Уставот и сите членови каде се споменува името – рече претседателот Иванов.
Според Иванов, Грција успеала да ги исполни своите максималистички барања.
-Тоа што го направи со Македонците во Грција, тоа сега настојува да го направи со Македонците во Македонија. Се што е свето за Македонија е погазено. Правото на неродените да бидат Македонци е ускратено – рече Иванов.
Тој истакна дека „ЕУ и НАТО не смеат да бидат алиби за штетен договор“.
-Ваквиот договор не го обединува општеството туку дополнително го поларизира. Ќе се залагам за решение кое нема да го нарушува достоинството на македонскиот народ и граѓаните на Република Македонија – рече тој.
Претседателот Иванов го повика мкедонскиот народ да не се плаши.
– Мојот став е конечен и нема да ме поколебаат со никакви притисоци, уцени и закани. Нема да потпишам ваков штетен текст на договор – со овие зборови Иванов го заврши својот говор.
https://www.facebook.com/dw.macedonian/videos/1898684453510127/
Премиерот Зоран Заев и министерот за надворешни работи, Никола Димитров, денеска остварија средба со претседателот Ѓорѓе Иванов на која го доставија договорот за решение за спорот којшто Република Грција го имаше со Република Македонија.
Како што се наведува во соопштението од владината прес служба, премиерот Заев и министерот за надворешни работи Димитров имаа конструктивен обид за презентација и за дискусија на содржината од договорот, но претседателот Иванов го прекина и напушти состанокот и одби да разговара за придобивките од овој историски договор за македонската иднина.
Претседателот Иванов ја напуштил средбата по две минути.