Парламентот на Холандија одобри отворање на преговорите за пристапување на Македонија кон ЕУ, јави албанската телевизија Топ Ченал.
Како што претходно најавуваа пратениците, оваа одлука значи дека и се дава слобода на холандската влада во донесувањето на одлуката за датумот за преговори за Македонија.
Истовремено пратениците се изјаснија против отворањето на преговорите за пристапување во ЕУ за Албанија. Според повеќето холандски пратеници, резултатите на Албанија не се доволни за да се преземе таков чекор, поради „сериозна загриженост во однос на борбата против корупцијата“.
Холандија и посебно Франција се познати по отпорот на нивната јавност кон проширувањето на ЕУ.
Сега, останува уште Франција да омекне до претстојниот Самит на ЕУ, кој ќе се одржи на 25 јуни во Брисел.
Во меѓувреме во Брисел продолжуваат расправите помеѓу земјите-членки на ЕУ за одредување датум за старт на преговори со Македонија во Советот на ЕУ, каде Франција и натаму се противи тоа да се случи во јуни и покрај договорот со Грција. Иако засега во нацрт-заклучоците останува стартот на преговори со Македонија, битката не е извојувана, информираа вчера дипломатски извори во Брисел за МИА.
Во обид да се убеди Франција, земјите членки прифатиле да се одреди условена одлука за преговори без временски рок кога конкретно тие би почнале, но ниту тоа не ги убедило Французите. Париз прифаќа да има „што попозитивен речник“ и охрабрувања за Македонија, но дека преговори во јуни не се можни. Став што им пречи на голем број земји членки, кои сметаат дека Македонија треба да биде наградена како за реформите, така и за договорот за името.
Меѓу најгласните во одбрана на старт на преговори е Бугарија, која до крајот на месецов претседава со ЕУ, и која исто така оценува дека преговори со Македонија во јуни ќе донесе и „престиж“ за нејзиното претседателство. Друга земја која турка за старт на преговори со Македонија е Австрија, која го презема кормилото на ЕУ од 1 јули.
Австрискиот амбасадор при ЕУ, Николас Маршик, денеска изјави дека тие би биле многу среќни преговорите со Скопје и Тирана да почнат за време на нивното претседателство кое почнува на 1 јули.
Останува сега да се види што ќе се случи во вторник во Луксембург, кога треба да се состанат министрите за надворешни работи на ЕУ и да дискутираат на оваа тема. Била спомената варијанта и преговори да се одредат во ноември годинава, велат изворите на МИА, што исто така не му е по вкус на бугарското претседателство, велат извори во Брисел.
Голем број земји-членки сметаат дека би било разочарувачки Македонија да не биде наградена по сите препораки на Европската Комисија и постигнатиот компромис со Грција околу спорот за името.
Скептиците да го признаат напредкот на Македонија
Земјите членки на ЕУ, а пред се „скептиците и кочничарите“ од Франција, Холандија и делумно од Германија, на Самитот на Унијата следната недела, треба да го признаат постигнатиот напредок со потпишувањето на договорот меѓу Скопје и Атина и да дадат зелено светло за почеток на пристапните преговори со Македонија, смета Франк Шаусбергер, специјален советник на еврокомесарот за проширување и соседска политика, Јоханес Хан.
Договорот за долгогодишниот спор за името на Македонија би можел да предизвика голем број позитивни последици за регионот и за цела Европа, оценува Шаусбергер.
Во тест за австрискиот весник „Пресе“, тој вели дека успехот на договорот меѓу Македонија и Грција ќе значи и потврда дека ЕУ може да има улога на посредник во разрешување конфликти и покрај огромните потешкотии во сопствените редови.
Стратегијата на ЕУ за проширување претставена на 5 февруари годинава, спроед Шаусбергер, предизвика динамика во земјите од Западен Балкан што не треба да се потцени.
– Договорот за името, доколку биде ратификуван, ќе предизвика серија последици. За Македонија ќе бидат отстранети пречките на патот кон почеток на пристапните прегвори со ЕУ. Можно е отворање на преговори и со Албанија иако Тирана прво мора да покаже дека е сериозна во врска со реформата на судството и борбата со корупцијата. Ставањето крај на спорот меѓу Макеоднија и Грција, може да даде нов импулс и во дијалогот меѓу Белград и Приштина, а ќе има позитивно влијание и на многуте нерешени прашања меѓу народите во Босна и Херцеговина, вели Шаусбергер.
Нагласува дека решавањето на билатералните проблеми меѓу земјите од Западен Балкан кандидати за членство во ЕУ е клучен и неизбежен предулов за нивната евроинтеграција, бидејќу Унијата не сака да увезува конфликти.