Жителите на Тимјаник попуштија и прифатија да се гради мал групен дом за децата со попреченост. Министерката за труд и социјална политика Мила Царовска вчера повторно ги посетила Неготино и Тимјаник и заедно со градоначалникот на Неготино Тони Делков ималe средба со локалните жители. Министерката за труд и социјала Мила Царовска вели дека недоразбирањата се веќе минато, а подготовките за малиот групен дом во Тимјаник продолжуваат.
„Никогаш не се сомневав во хуманоста на нашите граѓани и верував дека првата несакана епизода е само недоразбирање“. Мило ми е што овој пат имавме многу конструктивна дискусија и жителите дадоа поддршка на она што го правиме. Јас верувам дека Тимјаник ќе биде симбол на хуманоста на нашето општество, а жителите ќе се гордеат со тоа“, изјави министерката Царовска.
Во меѓувреме забрзано се работи на деинституционализацијата. Министерството за труд и социјална политика е во комуникација со другите општини кои што изразија подготвеност за отворање на мали групни домови.
Истовремено, МТСП во соработка со УНИЦЕФ ја промовира и кампањата „На секое дете му треба семејство“ која што има за цел да ги поттикне граѓаните да станат згрижувачи на деца без родителска грижа и да им овозможат да растат во безбедно и грижливо семејно опкружување исполнето со љубов.
Досега повеќе од 100 лица изразиле желба да згрижат дете . Борбата за похумано општество и заштита на децата ќе биде и понатаму главен фокус на МТСП, велат од таму.