Љупчо Стојановски, дедо на малата Тамара Димовска од Велес, денеска е осуден на една година ефективна казна затвор. Ваква одлука донесе Апелацискиот суд Скопје по жалбата на Основното јавно обвинителство (ОЈО).
Апелацискиот суд ја преиначи пресудата на Основниот суд кој го осуди Стојановски на условна казна затвор за поседување оружје по признанието на вина.
За 11 јули 2018 година се закажани завршните зборови за второто кривично дело „обид за убиство“ за кое што е обвинет Стојановски. Тој на први јуни 2017 година година пукаше во поранешниот министер за здравство, Никола Тодоров кој во пукањето не беше повреден.
Адвокатката Павлина Зефиќ рече дека ќе ги вложат сите правни лекови за да ја оспорат пресудата против Стојановски.
Деветгодишната Тамара Димовска од Велес, која имаше искривување на рбетот почина во февруари 2015 година откако ја загуби битката со здравствените лавиринти во Македонија.