Се намалува бројот на починати новороденчиња на Клиниката за гинекологија. НОВА неофицијално, од лекарски извори дознава дека во првите шест месеци од оваа година на Гинекологија починале 57 бебиња, за разлика од минатата година кога имаше 82 починати бебиња во првата половина од годината.
„Тоа значи намалување за 17, 7 проценти. Ова ни дава надеж дека работите тргнаа на подобро. Подобрени се условите за престој, а се работи на советување и едукација на кадарот“, потврдија извори од Клиниката за НОВА.
Дознаваме дека шест од починатите бебиња биле со тешки вродени аномалии, не само на срцето туку и на повеќе органи и тие не можеле да се спасат. Во два случаи морало да се прекине бременоста поради здравствени проблеми на родилките.
Директорката на Клиниката за гинекологија, Викторија Јовановска, ниту ја потврди ниту ја демантираше оваа информација, само кратко одговори дека се среќни заради напредокот. За повеќе детали најави дека ќе се изјасни Министерството за здравство,деновиве.
Јовановска рече дека очекуваат тим од лекари од Бугарија кои ќе работат на едукација и советување на медицинскиот персонал со цел намалување на смрттноста. Претходно, на Гинекологија престојуваа експерти од СЗО кои дале свои препораки и ги едуцирале лекарите за промена на начинот на пристап во некои сегменти.
Во март годинава јавноста беше алармирана дека во првото тромесечје на Гинекологија починале 35 бебиња. Од Министерството за здравство излегоа со податоци дека во првите три месеци од годинава на Клиниката за гинекологија биле родени вкупно 1.155 бебиња.
Од нив 144 биле предвреме родени и биле третирани на одделот за интензивна нега, а 35 починале. Починатите бебиња во периодот од јануари до крајот на март 2018 година спаѓаат во категоријата предвремено родени бебиња.
По ова, во април годинава од Клиниката за гинекологија најавија дека ќе бараат од Здружението на гинеколози и од Министерството за здравство при водењето на евиденција смртноста да се заведува од 25 гестациска недела бидејќи помалите бебиња тешко преживуваат.
„ Ќе го побараме ова од надлежните фактори бидејќи на овие простори како и во соседните земји процентот на преживување кај бебиња помали од 25 гестациска е екстремно мал. Тие се со неразвиени органи, може да имаат одредени аномалии, оштетен слух, вид“, изјави тогаш, Викторија Јовановска директорка на Клиниката за гинекологија.
Таа вели дека всушност поради ова се третира дека е толку голем процентот на смртност на новороденчиња.
Инаку, пред точно еден месец се случи раритет во македонското здравство-најмалото предвеме родено бебе во земјава ја доби битката за живот и ја напушти Клиниката за гинекологија каде четири месеци за него се грижеше стручен тим.
Малиот Бетим е роден во февруари годинава, во 23 гестациска недела(5,5 месеци) со тежина од само 700 грама и 31 сантиметар. Од Клиниката си замина точно на датумот кога требаше да биде роден. Тоа е првото предвереме родено бебе со толку мала гестациска недела и мала родилна тежина во нашата држава.