Инспектори од Државниот санитарен и здравствен инспекторат утринава влегле во болницата Санте Плус во Скопје за случајот со пациентката Мирсада Џуџевиќ Ќерими, која за НОВА изјави дека живее во страв дека ќе и излезат цревата од стомакот, по неколку неуспешни операции од кила, од кои три биле направени во Турција и една во Санте Плус во Скопје.
Таа, случајот го пријавила и во ДСЗИ, Лекарска комора, кај министерот Филипче и премиерот Заев.
Од инспекторатот констатирале дека пациентката Мирсада Џуџевиќ Ќерими не била воопшто евидентирана во дневникот на болницата, а лекарите не признавале дека воопшто ја лекувале пациентката иако за тоа постојат документи. Кога инспекторите им ги покажале отпусните писма со датум, печат и потпис од др. Ирена Гаџовска, од болницата рекле дека тие се превод од Турција.
Такво нешто било непоимливо за санитарните и здравствени инспектори бидејќи внатре пишува на какви анализи е праќана и која терапија и била давана, како и преврските и интервенцијата која и била извршена во болницата Санте Плус во Скопје.
„Пациентката воопшто не е евидентирана во дневникот на болницата. Докторката која интервенирала кај неа не е вработена во болницата, туку во ПЗУ Дерматологија и негира дека пациентката била таму и дека ја лекувала“, изјави др. Ирина Бухова, Директорка на ДСЗИ.
Од ДСЗИ најавија дека ќе превземаат мерки за кои ќе има дополнително известување.
НОВА вчера објави дека Мирсада на нејзиниот стомак повеќе нема мускули, туку само тенок слој на кожа поради кои како што вели, мора постојано да носи дебел и тврдо стегнат појас кој и ги држи цревата да не излезат. Се ова поради три неуспешни операции направени во болницата Санте Плус во Турција и една во болницата во Скопје.
„Јас живеам 24/7 со појас дури и при туширање не смеам да го извадам за да не ми излезат цревата надвор. Од операцијата на кила направена во болницата Санте Плус во Турција и во болницата во Скопје, јас останав инвалид, живеам со големи болки од нешто што не е направено како што треба, поради лекарска грешка“, изјави за НОВА, Мирсада Џуџевиќ Ќерими.
Менаџерката на Санте Плус во Скопје, Весна Камилова и вчера негираше дека пациентката Мирсада Џуџевиќ Ќерими била воопшто третирана во болницата Санте Плус во Скопје.
Таа тврди дека сите интервенции и биле направени во болницата во Турција, која е сосема друг правен субјект , односно дека Санте Плус во Скопје е фирма- ќерка на Санте Плус во Турција.