МВР ќе го истражува случајот со Мирсада Џуџевиќ Керими која била оперирана во болницата Санте Плус во Скопје, по три неуспешни операции од кила во Санте Плус во Турција. Ова од полицијата го побарал Државниот санитарен и здравствен инспекторат во консултација со Министерството за здравство, потврдија од ДСЗИ.
Ваквата одлука ја донеле по вонредниот инспекциски надзор со кој утврдиле дека пациентката воопшто не е евидентирана дека се лекувала во болницата и покрај обемната документација што ја доставила во Инспекторатот, Владата и Министерството за здравство. Во болницата тврделе дека воопшто не ја познаваат пациентката на која и била направена интервенцијата и според документацијата потпишана од хирург, три месеци се лекувала таму од компликации и настанатата инфекција.
Мирсада Џуџевиќ Керими заедно со целокупната медицинска документација во институциите доставила и документ од МРВ во кој се потврдува дека во тој период не ја напуштала државата, бидејќи менаџментот на болницата тврди дека медицинската документација е превод од болницата во Турција. Ваквите небулозни објаснување, за документи со потписи од македонски лекари кои работат таму и лабораториски испитувања во наши лаборатории, направената операција со потпис од лекар од болницата, биле доволен повод за надлежните институции да ја алармираат МВР.
Случајот со Мирсада Џуџевиќ Керими кој го објави НОВА, цел месец е во институционалните лавиринти на Министерството за здравство. Иако, ДСЗИ веднаш постапи по барањето на пациентката, а од кабинетот на премиерот Заев побараа што е можно побрзо да се постапи, од ресорното Министерството немаше конкретни мерки.
Поместување е денешната одлука, случајот да се предаде во надлежност на МВР.
Поради неуспешните операции и интервенциите кои во Санте Плус во Скопје не признаваат дека ги направиле, Мирсада живее во страв дека ќе и излезат цревата од стомакот на која повеќе нема мускули, туку само тенок слој на кожа поради кои, како што вели, мора постојано да носи дебел и тврдо стегнат појас кој и ги држи цревата да не излезат.