Фондот за здравство подготвува нова методологија за распределба на квотите за лековите на рецепт во аптеките, дознава НОВА од извори во ФЗОМ.
Неофицијално, според документи до кои дојде НОВА, а кои се уште не се конечни се прави распределба на квотите со која остануваат нераспределени 11 милиони денари. Ова создава дилема дали за граѓаните ќе има помалку лекови на рецепт.
Директорот на ФЗОМ, Ден Дончев тврди дека се работи на повеќе сценарија на нова методологија со цел да се оптимизираат квотите и дека ниту една од тие верзии не е конечна. Од ФЗОМ се децидни дека нема да има намалување на масата на пари за лекови на рецепт.
„Се работи на нова методологија на распоредување на квотите што за да биде подобро и за граѓаните и за ФЗОМ“, изјави за НОВА, директорот Дончев.
Иако беше најавувано дека лекови на рецепт ќе има во текот на целиот месец, тој проблем досега не се реши. Граѓаните се револтирани.
„Чекам да дојде 1 ви во месецот за да можам да набавам лекови кои ми се редовна терапија. Но, често ми се случува и да ги купувам после 15 ти во месецот кога ги нема на рецепт“, вели С.М, која е на терапија за срце и висок крвен притисок.
Ова е сериозен проблем за луѓето кои имаат здравствено осигурување, а се принудени да купуваат лекови на рецепт кога ќе ги снема во аптеките.
“Си го купивме антибиотикот бидејќи го нема на рецепт, во аптека ми рекоа дека се потрошиле квотите. Бев во неколку аптеки го нема бидејќи е крај на месец, а детето мора да го зема “, рече загрижен родител.
Пред неколку месеци Дончев изјави дека ФЗОМ нема контрола врз рецептите во аптеките и дека се можни злоупотреби од одредени матични лекари. Според него, постојат сериозни индиции лекови на рецепт да завршуваат на пазарите во некои од соседните земји и дека тоа е главната причина што нема лекови на рецепт после 10 ти во месецот.