Францускиот министер за надворешни работи, Жан-Ив Ле Дриан недела го покани претседателот на САД, Доналд Трамп, да не се меша во францускиот домашната политика. Реакцијата доаѓа откако Трамп, во серија твитови, го критикуваше движењето на “жолтите елеци” и француската политика.
“Му порачувам на Доналд Трамп, а и претседателот Макрон исто така му порачува: ние не учествуваме во американската дебата и ве молиме да не се мешате во животот на нашата нација”, изјави тој за француските медиуми. И додаде дека Франција не се меша во американската политика и бара, во таа област, реципроцитет.
Во саботата Трамп изјави дека денот во Париз бил тажен, по протестот на “жолтите елеци”. Според Трамп, “жолтите елеци” барале да се стави крај на Договорот за климата потпишан во Париз на крајот од 2015 година.
“Демонстрации и немири насекаде во Франција, демонстрантите “пеат го сакаме Трамп”. Ја обожавам Франција”, напиша тој на Твитер.
Шефот на француската дипломатија оспори дека за време на протестите “жолтите елеци” пееле дека го сакаат Трамп:
“Жолтите елеци” не протестираа на англиски, а фотографиите што се појавија се направени во Лондон, при посетата на претседателот Трамп на Велика Британија пред неколку месеци”, рече Ле Дриан.
Пријателските односи меѓу двете држави се влошија во последните неколку недели, откако претседателот на САД му се потсмеваше на Емануел Макрон минатиот месец, по неговото враќање од прославата на стогодишнината од Првата светска војна во Париз. Трамп преку Твитер ја критикуваше ниската популарност на Макрон. Очигледно е дека Трамп не може се уште да му прости на Макрон што тој, за време на неговата официјална посета на САД во апри годинава, одржа говор пред американскиот Конгрес во кој ја критикуваше климатската политика на Трамп.
Францускиот министер за надворешни работи, исто така, го поткачи и министерот за внатрешни работи на Италија Матео Салвини, кој исто така редовно испраќа критики на сметка на Макрон. Ле Дриан потсети дека Италија исто така се соочива со тешкотии и протести на десетици илјади луѓе поради железничкиот проект Лион-Торино (протести имаше во Торино против предложената железничка врска со Лион, за која велат дека претставува “губење на јавните пари”):
“Секој со своите тешкотии. Да ги почитуваме”, додаде тој.




