До сега МВР нема дадено никаква согласност за Судот да може да нареди распишување меѓународна потерница за гинекологот Николче Дамчевски. Ова за НОВА го потврдија од Основниот суд 1 Скопје. Како што објаснуваат, за Судот да нареди распишување ваква потернициа, потребно е претходно да добие согласност од МВР.
„Немаме добиено согласност од МВР за Судот да побара да се распише меѓународна потерница“, велат за НОВА во Основен суд 1 Скопје.
Од МВР пак, тврдат дека меѓународна потерница се распишува на барање на Судот. Воопшто не појаснија дека за Судот да распише потерница согласност треба да даде МВР.
„За Дамчевски има распишано национална потерница, што значи само во границите на нашата држава. Судот е тој кој што треба да побара и да иницира меѓународна потерница. Ние сме само извршители“, изјавија за НОВА во МВР, пред два дена.
Ваквата неусогласеност меѓу овие две суштински важни институции, резултираше со бегство на осудениот гинеколог Дамчевски. Нејасно е дали се работи за непознавање на работите на новата структура на власта во некоја од овие институции што резултира со ваков пропуст.
По пресудата на 7 ноември со која Апелација му ја зголеми казната од 1,6 месеци на 2 години затвор, Дамчевски имал упатен акт за издржување на казната уште на 14.11.2018 година, кога е побарано од МВР да се утврди неговата достапност. Од Основен 1 велат дека до овој момент Судијата за извршување на санкции не добил никаков одговор од МВР.
Зошто не бил спроведен Дамчевски на издржување на казната која веднаш била извршна, треба да одговарат од МВР.
Во меѓувреме НОВА од свои извори дознава дека Дамчевски не ја напуштил Бугарија и се уште се наоѓа во Софија. Извори од болницата за НОВА брифираат дека Дамчевски бил советуван од колегите и од раководството на болницата, да се предаде и да оди на издржување на затворската казна.
Додека МВР и Судот си ја префрлаат топката едни на други Дамчевски успеа да се вработи во софискиот Медицински центар„ Мајчин дом“каде извршуваше прегледи, поставуваше дијагнози и лекуваше се до моментот кога НОВА го откри и ја објави информацијата дека осудениот гинеколог избегал од државата.
Веднаш по ова Дамчевски доби отказ од работа, а бил избркан и од Бугарскиот сојуз на лекари. Додека тој слободно се движи и живее во соседна Бугарија, Македонија не презема никакви мерки за да го врати назад на издржување на казната. На Дамчевски му е одземена и лиценцата за работа на осум години.
Гинекологот кој е осуден за Тешки дела против здравјето на луѓето и фалсификување исправа, поради тоа што девет месеци лажеше пациентка дека е бремена, пред судот ја призна вината и за двете дела, Несовесно лекување и Фалсификување на медицински документи. На 7 ноември Апелациониот суд ја потврди пресудата од Основен суд 1 и му ја зголеми казната од 1, 6 месеци на 2 години казна затвор.