Препораката за преговори останува, но влошен е меѓународниот углед на Македонија по прашањето на слободата на медиумите, а корупцијата е и понатаму сериозен проблем во државата.
Во Брисел два дена пред објавувањето на годинешниот Извештај за напредокот, комесарите се уште одлучуваат дали и на кој начин, ЕК треба да учествува во поддршка на процесот за изнаоѓање на решение за името.
Една од опциите е на комесарот Фуле во овој процес да му се приклучи и шефицата на европската дипломатија Кетрин Аштон. Другата варијанта за која се разговара во моментов е дали воопшто ЕК да има улога во овој процес.
Другите делови на извештајот се веќе утврдени. Препораката за почеток на преговорите останува. Слободата на медиумите е и оваа година една од клучните точки.
Во извештајот се наведува дека е влошена меѓународната репутација на Македонија по прашањето на слободата на медиумите. ЕК бара да се обнови дијалогот меѓу власта и ЗНМ и тој дијалог да обезбеди конкретни резултати во насока на подбрување на медиумската култура.
Извештајот исто така констатира поларизација во медиумскиот простор по политички линии, која го спречува развојот на објективното новинарство и врши економски притисок врз медумите и нивните сопственици. Состојбата е влошена особено по, како што се вели во извештајот, насилното исфрлање на пратенците од опозицијата и новинарите од Собранието на 24 декември минатата година. ЕК бара целосно имплементирање на мартовскиот договор.
Во делот на економијата се констатира макроекономска стабилност, но и зголемување на трговиот дефицит и јавниот долг. ЕК исто така оценува дека невработеноста особено кај младите е загрижувачки висока и бара Владата да преземе мерки за да се поправи ситуацијата.
Во делот на добрососедските односи ЕК повторно бара да се избегнуваат дејствија и изјави кои негативно влијаат на развојот на добрососедските односи.