Бројот на жители во Кина, најмногубројната земја на светот, за првпат се намали во последните 70 години, оценуваат експертите и покрај напуштањето на политиката на едно дете. Иако официјалните податоци ќе бидат познати до крајот на јануари, сепак, експертот Ји Фуксијан, истражувач кој работи на американскиот Универзитет „Медисон“ во Висконсин, проценува дека во 2018 година е паднат наталитетот за 1,27 милиони лица.
Тоа не е многу во споредба со вкупен број на Кинези (1,39 милијарди), но опаѓачкиот тренд се бележи за првпат во историјата на Народна Република Кина основана во 1949 година.
По пронаталитетната политика на основачот на денешна Кина, Мао Це Тунг, во доцните 70-ти години земјата воведе политика на едно дете што честопати беше критикувана.
Сепак, поради стареење на населението, Пекинг во 2016 година им дозволи на сите семејства да имаат по две деца. Меѓутоа, поради трошоците за образование, здравствено осигурување и домување, многу двојки сè уште се одлучуваат само за едно или пак воопшто да немаат деца.
Како последица на тоа, според Ји, бројот на породувања лани се намалил за 2,5 милиони, иако во Пекинг во 2018 година беа предвидени 790.000 породувања, а на национално ниво 10,31 милиони.
Во исто време, бројот на смртни случаи е зголемен за 11,58 милиони, наведува Ји, кој во своите пресметки се потпира на локални статистички податоци.