Нови вакцини со декларации со истечен рок се најдени при инспекцискиот надзор на терен во вакциналните пунктови, еден ден пред посетата на претставници од белгискиот производител „Глаксо Смит Клајн“ од Белград, објави Независен весник.
Директорот на Агенцијата за лекови и медицински средства МАЛМЕД, Ќахил Ибраими, не открива за колку вакцини МРП со декларации со стар датум станува збор и во кои здравствени домови и градови. Проверка се прави и на целата документација на компанијата „Македонија лек“, која е увозник и дистрибутер на вакцината МРП до здравствените домови. Иако здравствените власти очекуваа резултатите од контролата да бидат готови порано, за „Независен весник“ велат дека ќе ги обелоденат денеска.
-Инспекторите во средата влегоа во компанијата ‘Македонија лек’, каде што и во текот на вчерашниот ден ја проверуваа документацијата. Треба точно да се утврди на колку вакцини им биле аплицирани декларации со истечен рок. Планираме денеска да ги имаме резултатите од контролата и да ги обелодениме. Се проверуваат и вакциналните пунктови. Ќе излеземе со точен број на вакцини што се најдени деновиве со декларации со истечен рок. Кај вакцините нема никаков проблем со рокот, сите се со важечки рок и се работи за сериозна фирма производител. Тоа што е направено со декларациите е техничка грешка. Ќе има санкции за компанијата увозник по ваквиот пропуст, тоа во моментов го разгледуваме. Во правилникот за дистрибутивна пракса разгледуваме да внесеме новини, да го прошириме за во иднина да се внимава како се дистрибуира лекот од увозникот и како се прима во здравствените домови. Да се следи дистрибутивниот синџир и точно да се дефинираат казните како за последната направена техничка грешка, изјави Ибраими за „Независен“.
Попладнево, министерот за здравство Венко Филипче ќе има средба со претставници на белгиската компанија производител на вакцината МРП „Глаксо Смит Клајн“ од Белград. Тие доаѓаат во земјава откако се известени за направената техника грешка -аплицирањето декларации со истечен рок на вакцините кои беа откриени при вонредниот инспекциски надзор во здравствените домови што го изврши Комисијата што ја формира Филипче.
На прес конференцијата во вторникот, Филипче најави дека, ако се покаже пропуст, ќе се разгледа можноста за раскинување на сите договори со компанијата увозник и дистрибутер на МРП вакцините и за одземање на дозволата за работа.
Тогаш тој кажа дека кај еден процент од вкупниот број дистрибуирани вакцини од таа серија има декларација со постар датум: во поликлиниката Железничар, и во здравствените домови во Демир Хисар, Велес и Свети Николе.
Министерството за здравство вчера соопшти дека на Инфективната клиника во Скопје се хоспитализирани седум деца на возраст од две години со симптоми на мали сипаници (морбили). Сите деца се од населбата Ново Лисиче од Скопје и ја посетувале детската градинка „Сонце“. За овие седум пријавени случаи се чека лабораториска потврда.
Инаку, досега се заболени осум деца од оваа градинка, сите невакцинирани со МРП вакцината. Во групата имало 28 деца сите невакцинирани.
Од 16 декември до вчера вкупно 22 лица биле хоспитализирани на Инфективната клиника во Скопје. Од нив, 13 лица се уште се хоспитализирани, а девет се веќе пуштени на домашно лекување. Најмладиот пациент е осуммесечно бебе, а најстариот има 33 години од Скопје.
Најмногу заболени има во населбата Ново Лисиче (општина Аеродром) – вкупно девет деца.
Од вкупниот број заболени, осум пациенти од Скопје биле со полесна клиничка слика и се на домашно лекување. Според податоците од Клиниката за инфективни болести и фебрилни состојби, досега се прегледани околу 30 пациенти за кои се сомневале или потврдиле дека се заболени од морбили. Досега во сите вакцинални пунктови во Скопје се вакцинирани 1.692 лица, а само денес до 13 часот вакцинирани се 85 деца.
Од Министерството повикуваат децата да се вакцинираат и посочуваат дека има доволно количини МРП вакцини. Вакцините кои се аплицираат во сите здравствени домови се со добар квалитет, од европски производител и имаат добар рок на траење, наведуваат од Министерството.
Од Министерството за образование соопшти дека ја следи ситуацијата со епидемијата од морбили, во координација е со министерствата за здравство и за труд и социјална политика и врз основа на состојбата на терен ќе одлучи за евентуално одложување на второто полугодие од учебната 2018/2019 година, што треба да почне на 21 јануари




