Министерот за здравство Венко Филипче денеска соопшти дека болницата во Штип продолжува да се гради и треба да биде завршена во 2020 година.
– Добивме информација од изведувачот со кој Министерството за здравство има потпишано договор. Тоа е грчката фирма Интракат, дека го раскинале договорот на досегашниот подизведувач и бара продолжување на роковите. Рокот го продлживме за една година и сега крајниот рок кога треба болницата да биде завршена е 2020 година, изјави Филипче.
Во меѓувреме, како што рече, забележуваме, а имаме и извештаи од надзорот дека работите се изведуваат со навистина забрзана динамика.
– Имаме интензивна комуникација и со градоначалникот на Штип, кој треба да преземе обврски за некои сообраќајни решенија, рече Филипче.
Тој изрази надеж дека следната година Штип ќе добие нова и современа болница.
Состојбата со морбилите
Вакцинацијата се одвива со добра динамика. Околу 50-тина отсто од вкупниот број невакцинирани деца сега се вакцинирани. Се уште трае тој тренд на интерес кај родителите за да ги вакцинираат своите деца, што е за поздравување, изјави денеска Филипче.
За жал, како што рече, секој ден има нови случаи на пациенти со морбили кои се примаат на Инфективната клиника.
– Помеѓу четири-пет до десет пациенти на ден се прегледуваат. Тие кои се со полесна форма се упатуваат на домашно лекување, а останатите се хоспитализираат. Вкупниот број пациенти што се лечат на Инфективна клиника е 30-тина. Децата кои имаат потешка форма, компликации, во смисла сериозно воспаление на белите дробови, се уште се во тешка, но стабилна состојба, рече Филипче.
Според него, тоа со што сега се соочуваме за жал е резултат на падот на колективниот имунитет, што се случува од 2014 година наваму.