Нов непотврден случај на МРСА во нос кај дете од шесто одделение во ОУ „Панајот Гиновски“ ги вознемирил родителите на децата кои посетуваат настава со него. Неофицијално, родителот на детето донел резултат од лабораторија, но случајот ниту тој, ниту матичниот лекар не го пријавил во Центарот за јавно здравје во Скопје.
Во моментот екипи од Центарот за јавно и инспектори од ДСЗИ се упатени на терен да утврдат за што точно се работи.
„Треба да се остават инспекторите да си ја завршат работата, потребно е време да ги потврдиме случаите. Не може за секој поединечен случај да одиме посебно особено што не се пријавени, молиме за трпение“, изјави за НОВА, Ирина Бухова директорка на ДСЗИ.
Од Центарот за јавно здравје и од ДСЗИ апелираат до родителите да не прават непотребна паника бидејќи МРСА не е болест, тоа е бактерија која може да предизвика инфекција, а не смртоносна болест. Згора на се велат од таму, се знае каде се пријавуваат вакви работи, не на социјалните мрежи каде што се шири паника и се прави тензија.
„Апелираме да не се прави паника. Нема никаква опасност, ситуацијата е под контрола на терен и се испитуваат сите случаи. Во Центарот за јавно здравје нема нови пријавени случаи“, велат од таму.
Лекарите потенцираат дека нема опасност од инфекција кај здрав организам. Вчера епидемиологот Жарко Караџовски од Институтот за јавно здравје објасни дека бактеријата многу често ја има во последно време, а за да стане смртоносна треба да исполнети повеќе услови односно се регистрира кај лица со нарушен имунитет, кај лица кои имаат други тешки заболувања, чие претходно заболување може да придонесе за отежнато и подолготрајно лекување. Оваа бактерија, нагласи, бара посебен третман, заради тоа што нејзината вирулетност е голема и бара изолација.
„Секое лице кое е инфицирано со оваа бактерија мора да се изолира од колективот, односно во здравствена институција, во болничка соба каде не може да дојде во контакт со други лица… треба кај матичен доктор да се лекува согласно антибиограмот. Лекувањето трае најмалку седум до десет дена и не смее да се прекинува. Оној момент кога ќе добиеме негативна култура односно кога во брисот од нос и грло нема да најдеме присуство на оваа бактерија лицето може да продолжи со својата работа. Затоа внимателно во делот на испишување или кажување дека се работи за смртоносна бактерија. Истите лица кои вчера беа „тешко болни“ денеска функционираат без проблем“, рече епидемиологот Караџовски.
Појасни дека станува збор за бактерија која прави контаминација на својата околина, која тешко се искоренува, заради тоа што не реагира на најголем број антибиотици, но, има антибиотици од групата ванкомицин кои се даваат во редовна употреба за нејзино лекување.
Како што вчера потврдија од ДСЗИ за НОВА, кај четири деца е пронајдена бактеријата МРСА во нос во градинката „Снежана“ во Чаир, а во основното училиште „Панајот Гиновски“ кај едно од децата. Направена е дезинфекција и преземенис е сите мерки за заштита на децата.