Кај шест деца кои ја посетувале групата со две и пол годишното девојче што почина од сепса, во нос е изолирана бактеријата стрептококус пнеумонија, дознава НОВА. Станува збор за градинката „Пеперутка“ во населбата Драчево, која е клон на градинката „8 Март“.
Во Центарот за јавно здравје, каде што ја потврдија информацијата, велат дека не знаат дали има поврзаност меѓу детето кое почина на Детската клиника од истата бактерија, која кај него предизвика сепса во крвта и останатите деца во групата. Од таму велат дека веднаш по овој случај бил направен епидемиолошки надзор и биле земени 31 брис од децата од првата мала и од големата група бидејќи децата од двете групи често се мешаат. Кај 6 деца е пронајдена оваа бактерија, а кај 25 не е изолирана патогена бактерија.
„Кај ниту едно од децата кај кои што е изолирана бактеријата не развила инфект бидејќи имале подобар имунитет. Направена е дезинфекција, преземени се вообичаени сет на мерки, а децата се изолирани дома додека не добијат позитивни резултати“, изјави за НОВА, др.Александар Стојанов од ЦЈЗ.
Две и пол годишното девојче почина на 4 март, откако претходно било третирано една недела кај матичен лекар. На Клиниката за детски болести било донесено со знаци за сериозна бактериска инфекција.
Епидемиолозите велат дека девојчето најверојатно имало намален имунитет. Но, нема одговор од надлежните како дошло до тоа толку време да се чека за бактеријата да премине во крвта и да дојде до фатален исход.
Во градинките и училиштата најважна е хигиената и редовно миење на рацете, порачуваат епидемиолозите. Доктор Стојанов вели дека е потребна задолжителна вакцинација против оваа бактерија , како и против рота вирусот, што најверојатно годинава ќе се случи и овие вакцини ќе влезат во календарот за задолжителна имунизација.
Епидемилозите велат дека место за паника нема, како за овој така и за случаите со МРСА кои беа изолирани кај деца во градината„ Снежана“ во Чаир и во ОУ„ Панајот Гиновски“. Дознаваме дека родителите ги носат децата од ова училиште масовно за да им се земат брисеви и во ЦЈЗ е вистинско навалица во лабораторијата. Раководството на училиштето одлучило да ги варосува училниците. Стручњаците велат дека се направи непотребна паника и таа била предизвикана најмногу преку социјалните мрежи.
„ Земавме 130 бриса, нема потреба од такво нешто. Родителите треба да знаат дека кај децата што била изолирана оваа бактерија, тие се здрави клицоносители. МРСА е опасна во болнички услови, ако го нападне организмот на болни луѓе со намален имунитет“, вели др.Стојанов.
Лекарите потенцираат дека нема опасност од инфекција кај здрав организам и апелираат да не се создава паника. Епидемиологот Жарко Караџовски од Институтот за јавно здравје објасни дека бактеријата многу често ја има во последно време, а за да стане смртоносна треба да исполнети повеќе услови односно се регистрира кај лица со нарушен имунитет, кај лица кои имаат други тешки заболувања, чие претходно заболување може да придонесе за отежнато и подолготрајно лекување. Оваа бактерија, нагласи, бара посебен третман, заради тоа што нејзината вирулетност е голема и бара изолација.