Долниот дом на британскиот Парламент усвои предлог-закон, кој гарантира дека земјата не може да излезе од ЕУ без договор.
Пратениците го усвоија предлог-законот со само еден глас разлика, односно 313 гласаа „за“, а 312 беа „против“.
Британија има само осум дена до 12 април да го усвои договорот за Брегзит и да излезе со нов план, или да ја напушти ЕУ без договор, што ќе предизвика огромни пречки и последици за граѓаните и компаниите во таа земја, но и во Унијата.
Предлог-законот треба да го усвои уште Горниот дом на Парламентот, што е многу веројатно. Со овој закон не се обврзува ЕУ да се согласи на одложување на Брегзит.
– Денешните разговори беа конструктивни, а двете страни покажаа флексибилност и посветеност да се заврши моменталната неизвесност околу Брегзит, изјави портпаролот по состанокот, додавајќи дека е „постигнат договор околу програма за натамошна работа со цел да се обезбедат работни места и да се осигура безбедноста на британските граѓани“.
Откако трипати не успеа да добие поддршка од Парламентот за нејзиниот договор со ЕУ, Меј најави дека повторно ќе бара одложување на Брегзит и дека ќе разговара со Корбин за да најдат компромис.
Корбин се согласи на состанок, истакнувајќи дека царинската унија и работничките права треба да бидат приоритет. Тој претходно жестоко ја критикуваше Меј и во неколку наврати ја повика да поднесе оставка.
Коментирајќи ја ситуацијата во Британија, германската канцеларка Ангела Меркел изјави дека до последен момент ќе се труди да обезбеди уреден Брегзит, но пред се Велика Британија треба да најде решение.
Според Меркел, спречувањето на хаотичен Брегзит, без договор со ЕУ, е во интерес на Велика Британија, но и во интерес на Унијата.
– Решенијата мора да се пронајдат во Велика Британија. Се прават интензивни напори, но може да се забележи дека има различни идеи, истакна Меркел по состанокот со регионалните функционери во источниот дел на Германија.
Европската комисија вчера соопшти дека, како што сега стојат работите, Велика Британија ќе ја напушти ЕУ без договор на 12 април на полноќ.
– Општиот впечаток за сценарио „без договор“ не може да се ублажи. Подготовките продолжуваат во земјите членки со поддршка од страна на Комисијата, а многу е важно да се обезбеди националните царински инфраструктури и логистика да бидат подготвени за такво сценарио, се наведува во соопштението на Еврокомисијата.
Комисијата посочува дека ЕУ жали поради решението на Велика Британија да го напушти блокот, но дека ја почитува таквата одлука, додавајќи дека Брегзит никогаш не бил избор на Унијата, како и дека британското истапување без договор не е сценарио што го поддржува Брисел.




