Снежана Димова, мајка на 27 годишниот Григор кој боледува од цистична фиброза бара да се преземат итни мерки за негово лекување поради опасната бактерија која се надоврзала на основната болест и чиј генотип е откриен во Клиниката Голник во Словенија. Тој во моментот е единствениот пациент со оваа бактерија во државата, а неговата мајка вели дека македонското здравство нема искуство во лекување на вакви случаи.
„Нетуберколозната бактерија mycobacterium abcsessus создава гнојни кеси во белите дробови и може да биде фатална по неговиот живот доколку не се лекува, а во моментот Григор е без терапија“, тврди Димова.
Таа смета дека во државата се исцрпени сите можности за негово лекување, дека нема услови ниту соодветен кадар за да се лекува по протокол, во изолација со примање интравенски на неколку видови антибиотици во траење од 4 месеци и две години со друга терапија. Затоа бара нејзиниот син да биде пратен на лекување во соодветна клиника во странство или да и гарантираат дека ќе го лекуваат по протокол. Таа нагласува дека лекувањето во странство во оваа фаза ќе ја чини државата поевтино, отколку трансплантацијата на бели дробови.
Во Детската болница во Козле каде што е Центарот за цистична фиброза предложиле да биде задржан на лекување таму, но родителите не прифатиле додека не се одреди генотипот. Оваа мајка во очај вели дека откога се вратиле од Словенија каде биле на сопствен трошок, во болницата не го примаат с о образложение дека нема место, а можат да се заразат други деца со цистична фиброза кои се хоспитализирани таму.
„Потоа не пратија во Институтот за ТБЦ со предлог таму да биде изолиран, а лекар од Козле да доаѓа секој ден да го следи. Но, од таму ми се јавија дека испратиле допис до Министерството за здравство дека тие немаат услови за лекување на нашиот син“, рече Димова.
За ваквата состојба Димова го известила Народниот правобранител бидејќи смета дека нејзиниот син е дискриминиран во однос на лекувањето. Со состојбата е запознаен и Државниот санитарен и здравствен инспекторат, како и министерот за здравство Венко Филипче кој се уште не се изјаснил што ќе преземе.
НОВА, го контактираше и директорот на Детската болница во Козле, Ангелчо Андоновски кој тврди дека родителите на почеток одбивале нивниот син да биде сместен таму, но сега нема место бидејќи има други деца со цистична фиброза. Тој го испрати и дописот од лекарот Матјаж Флежар од Словенија кој ги известува дека лекови на нивната клиника, а за излекување гаранцијата е 50-50, со што и не прифаќаат да се лекува таму. Флежар препорачува неколку референтни клиники во Европа, каде што може да се спроведе лекувањето.
И додека надлежните со родителите се натегаат каде ќе сместен младиот Григор и на кој начин ќе се лекува, тој е без терапија, а неговиот живот е во опасност.
Во државата има околу 40 возрасни пациенти со цистична фиброза, а не постои специјален центар за возрасни и тие се лекуваат заедно со бебињата и малите деца.