За една недела регистрирани се 134 ново заразени лица од морбили.
Во последните десетина недели овој број континуирано се одржува околу 100, но ова е највисоката бројка регистрирана воопшто откако беше прогласена епидемијата.
„Од новозаболените 48 се од Скопје, а останатите 86 се од десет други градови со што вкупниот број на градови во кои има заразени од морбили е 22“ рече д-р Гордана Кузмановска од Институтот за јавно здравје денеска пред Министерство за здравство.
Вкупниот број на регистрирани заразени од морбили од почетокот на епидемијата, е во постојан пораст и последната бројка изнесува 1.524.
Најголем број се возрасни лица над 30 годишна возраст.
„ Што се однесува до вакциналниот статус од сите заболени на неделно ниво 70 проценти се невакцинирани, со непознат статус или непотполно вакцинирани“ рече Кузмановска.
Таа додаде дека и во наредниот период ќе има ново заразени лица и не очекува брзо смирување на епидемијата.
„Со тешки компликации, бронхопнеумонија, дијареа и други потешки инфекции се околу 16 проценти од сите заболени, но бројката во однос на хоспитализираните е нешто повисока и се движи повеќе од 40 проценти“ рече Кузмановска.
Вкупно вакцинирани деца до 14 годишна возраст од почетокот на кампањата досега се 25.808.