Кети Ставриќ се уште е директорка на Клиниката за детски болести, потврдија за НОВА од Министерството за здравство.
Нејзиното барање за оставка чека на потпис од министерот Филипче уште од февруари годинава. Тогаш НОВА упати прашање до Министерството за здравство, дали е вистина дека поднела оставка. Од таму одбегнаа да објаснат дали ќе биде прифатена нејзината оставка и само кратко одговорија дека „Ставриќ се уште е директорка“.
На 18 февруари прашање и беше упатено и на директорката Кети Ставриќ, но таа не одговори во врска со нејзиното барање за оставка кое го поднела до Министерството за здравство. На телефонскиот позив не одговори и денеска.
Филипче денеска изјави дека ќе разговара со Ставриќ за тоа дали ќе остане на идејата да се повлече од директорското место.
„ Директорката на Клиниката за детски болести за време на изборниот период поднесе оставка. Треба деновиве да разговараме да видам за што станува збор, дали ќе остане на таа идеја да се повлече или ќе сака и понатаму да продолжи да раководи со Клиниката. Доколку остане на идејата да се повлече ќе разговараме со друг кандидат за директор“изјави Филипче.
Од Министерството за здравство нема други детали околу оставката, како на пример зошто толку време се чека бидејќи изборите завршија пред повеќе од две недели, како и за тоа кој би можел да биде следниот кандидат за избор на нов директор на Клиниката за детски болести.