Во канцеларијата на Народниот правобранител секојдневие се апсурдните случаи во кои граѓаните се обесправени, еден таков случај е и неправдата со која се соочува кавадарчанецот Бранко Димков.
Тој со години плаќа комунална такса за улично осветлување каде што воопшто нема осветлување. Димков има лозов насад во атарот на местото викано Кртозов рид во кавадаречкото село Дреново.
– Се обратив право кај Народниот правобранител бидејќи прво поднесував молби до Општината, но залудно. Веќе десет години плаќам за улично осветлување кое не постои – вели Димков.

Тој повеќе години имал реагирано писмено до надлежните во Општина Кавадарци да го ослободат од плаќање на уличното осветлување, но залудно. Затоа решил да се обрати до Народниот правобранител.
„На ненаселено место имаме броило за струја. Броилото се наоѓа во лозје. Целото тоа место е со ниви и лозја, нема никаква куќа и воопшто не е населено. Струјата ја користиме исклучиво за наводнување на лозов насад со електрична пумпа. За тоа си плаќаме и индустриска струја. До местото каде што е броилото се доаѓа по земјен пат што по автоматизам нема ниту нормален пат, ниту пак име на улица. На ниту една од бандерите нема ниту инсталација за улично осветлување, а камоли сијалици, што значи тотален мрак, а од Општина Кавадарци веќе 5 години ни наплатуваат улично осветлување по индустриска тарифа од 280 денари“ пишува во претставката која Димков ја поднел до Народниот правобранител.
Градоначалникот има поинакво мислење, речиси филозофско, а тоа е дека овој пример од Кавадарци треба да го преземат и останатите општини.
Јанчев смета дека јавното осветлување е општествена одговорност на граѓаните и дека тие мора да го плаќаат.

Во писмениот одоговр на барањето на Димков, Општината цитира низа членови и ставови од Законот за комунални такси, според кој граѓанинот може да биде ослободен од плаќањето на комуналната такса, со што го поткрепува својот став дека Димков не може да биде ослободен од плаќање.
Сепак Општината во одговорот го заобиколува фактот дека на бандерата која се наоѓа во близина на неговиот лозов насад воопшто нема сијалица која би можела да осветлува, па поради која тој би требало да плаќа такса за осветлување.
– Не е спорно дека за секоја услуга што се користи, секој давател на таа услуга треба да бара таа да се плати, меѓутоа во случајов се бара да се плати за услуга што не се користи, ниту пак постои објективна можност да се искористи. Ставено е броило кое не е ниту на куќа , ниту на индустриски објект, и аналогно на тоа нема ниту систем за улично осветлување. Народниот правобранител смета дека околноста што станува збор за ненаселено место треба да биде причина граѓанинот и сите како него да бидат ослободени од плаќање на оваа такса, а не Општината по свое да си го толкува Законот дека само во населени места каде што нема воспоставено систем на улично осветлување, само таму луѓето можат да бидат ослободени – вели Зоран Билбилоски од канцеларијата на Народниот правобранител.
Димков вели дека не се откажува пред оваа неправда и дека ќе продолжи да бара начини да се избори за правдата и да престане да плаќа комунална такса за нешто што не го добива.




