Споменикот на стреланите Скопјани го нема покрај камениот мост. На Денот на ослободувањето на град Скопје, граѓаните нема кај да положат цвеќе за деветмината невооружени загинати граѓани, кои платија со животот за својот град.
За тоа каде е релјефот, и дали и кога ќе биде вратен на истото место, НОВА разговараше со претседателот на Општинскиот одбор Центар при Сојуз на Борците како и со општина Центар, кои заедно потпишале договор на 29 март 2010 година за релокација на истиот.
Оттаму соопштуваат дека не знаат кој го срушил објектот, а релјефот од него се чува во магацините на Центар и ќе биде предаден тогаш кога одговорниот ќе го врати споменикот.
Побаравме одговор за тоа кој е одговорен и од град Скопје, но оттаму не упатија одговорот да го бараме во општина Центар.
„Општина Центар е инвеститор на плоштадот Карпошово востание и само тие може да Ви одговорат кога ќе заврши проектот и кога ќе ги исполнат обврските од спогодбата со боречката организација“, стои во одговорот од град Скопје.
Според неофицијални наводи, споменикот е тргнат од фирмата која ги извршува градежните активности на плоштадот „Карпошово востание“. НОВА побара одговор од двете најголеми градежни компании, „Гранит“, односно „Бетон“.
Од „Гранит“ беа децидни дека тие не ги извршуваат градежните активности на тоа место, додека од „Бетон“ ни потенцираа дека само директорот може да даде изјава на таа тема, но дека во моментов е на пат и не се можност да ни дадат одговор.
На 13 ноември пред 67 години борците од 42-та и 50-та Народноослободителна дивизија на македонската војска и 16-та Македонска бригада го ослободија Скопје од фашистичката окупација, а по разговорот со граѓаните низ улиците на Скопје, тие велат секогаш ќе им останат во сеќавање 9мината загинати и покрај тоа што годинава ќе се прославува без нивното спомен-обележје.