На денешната прес – конференција, потпретседателот на СДСМ, Гордан Георгиев, го објави планот за дејствување во наредните денови. Според опозицијата, единствен начин да се реши политичката криза се фер и слободни предвремени парламентарни избори одржани во исто време со локалните.
„Веќе три недели режимот на Груевски глумејќи нормалност се однесува како ништо особено да не се случило на 24 декември. Ние понудивме разумен и остварлив план за излез од политичката криза преку фер и слободни предвремени парламентарни кои би се одржале заедно со локалните избори.
– Ако има навистина политичка волја и минимум разум кај власта, има доволно време до 24 март да се постигне политички договор со што ќе се избегне продлабочување на кризата,
– Бидејќи власта и понатаму се однесува неодговорно, изјави Георгиев, од утре наместо како досега по една, ќе бидат блокирани три раскрсници во Скопје, почнувајќи точно на пладне“. рече потпретседателот на СДСМ, Гордан Георгиев на денешната прес конференција.
– Ќе бидат блокирани раскрсниците на „Партизанска“ пред Симпо, мостот „Гоце Делчев“ кај Владата и раскрсницата пред „Тутунски комбинат“ кај Стара рампа. Свесни сме дека овие блокади можат да предизвикаат непријатности и нервоза кај граѓаните, но имајќи предвид дека се работи за отпор против режим, кој секојдневно им ја одзема слободата на граѓаните и иднината на земјата, апелираме за трпение и поддршка за протестите – нагласи Георгиев.
Покрај блокадата на трите скопски раскрсници, отпорот продолжува и во Куманово, каде со почеток во 18 часот ќе се организира марш против режимот кој ќе заврши со граѓански парламент.
– Минатата недела, „Сојузот за иднината“ организираше серија маршеви и граѓански парламенти, на кои граѓаните масовно изразуваа револт и отпор кон режимот, каде јасно и недвосмислено беше истакната поддршката за нашиот план за враќање на демократијата во земјата – изјави потпретседателот на социјалдемократите.