Во Општата болница во Дебар четворица млади лекари работеле со Договор на дело, за сума од 15 000 денари без платени придонеси за здравствено и пензиско осигурување, потврдија за НОВА од Министерството за здравство.
Од таму велат дека четворицата млади лекари се стекнале со лиценца за работа пред еден месец. Од Министерството се правдаат дека болницата има потреба од кадар и токму затоа ги вработила младите лекари за да ги задржи во Дебар.
„Во меѓувреме е испратено барање за обезбедување финансиски средства за вработување на неопределено време на лекари. Додека да се заврши процедурата, се објави конкурс и се заврши со тестирање и избор на кандидатите, овие млади лекари се стимулирани со платена пракса и можност да се пријават на конкурсот кој ќе биде распишан наскоро. По стекнувањете на стаж, тенденција е сите млади лекари да бидат вработени на неопределено доколку ги исполнат критериумите и барањата на конкурсот“, велат за НОВА од Министерството за здравство.
Од ресорното Министерство потенцираат дека до 30 јуни бил рокот за пријавување на јавниот повик за изразување интерес за работа на доктори на медицина во примарна здравствена заштита (ПЗЗ) во здравствените домови каде ќе можат да работат шест месеци со платена пракса.
„Ги повикавме сите заинтересирани доктори на медицина со лиценца за работа во ПЗЗ да се пријават на повикот и да достават писмо за интерес до Министерството за здравство, со цел да се обезбеди можност за работа во траење од шест месеци“, с евели во одговорот на Министерството за здравство.
Како што вчера објави НОВА, од Здружението на лекари специјализанти ЗЛС, објавија документ со кој се потврдува дека лекар во Општата болница во Дебар работи со Договор на дело за само 15 000 денари, а документот набргу се прошири на социјалните мрежи каде наиде на остри коментари. Документот го споделија од Здружението на лекари специјализанти ЗЛС, а потоа и од Асоцијација на специјализанти и млади лекари, од каде потврдија дека се работи за веродостојна потврда.
Кратко откако го објавија документот од здруженијата потврдија имаат дозвола од лекарот да се објави за која болница станува збор. Додека вчера се мислеше дека станува збор за двајца лекари од Министертвото потврдија дека станува збор за четворица млади лекари.
„Станува збор за Јавна здравствена установа, Општа болница во Дебар која не смее да си дозволи да функционира со лекари со Договор на дело. Ако имаат недостог од медицински кадар, нека ги вработат, а не да ги злоупотребуваат избегнувајќи да плаќаат придонеси за здравствено и пензиско осигурување. На овој начин нема да ги задржат во државата“, велат во ЗЛС.
Работните обврски на овие лекари им почнуваат во 08 и траат до 16 часот, а работите ги извршуваат како и останатите вработени доктори во болницата , дежураат, ги викаат на повик за транспорт на пациенти и после работното време. Дневница кога се работи за транспорт на ургентни пацинети до Скопје изнесува 400 денари, а до Охрид 200 денари.
Инаку, плата на лекар во секундарно здравство, односно во болниците изнесува околу 30 000 денари. Од здруженијата велат дека со двајца доктори на кои им даваат хонорар по 15 000 денари што е еднакво на плата за еден лекар, болницата си го „решила“ проблемот со недостиг на кадар и тоа без дополнителни трошоци за придонеси.