Обвинителката во СЈО Елизабета Јосифовска изјави дека таа го потпишала позивното мислење за да му се одобри времен пасош на бизнисменот Камчев по налог на Катица Јанева.
Во изјава за повеќе медиуми попладнево таа вели дека Камчев барал да добие времена патна исправа, но Јанева тогаш била на одмор. Таа и Ленче Ристовска како заменички на Јанева се овластени да потпишуваат во нејзино отсуство.
-Кај мене стигна готово мислење од Јанева, изготвено од соодветни стручни соработници. Ми кажаа дека ова позитивно мислење е по налог на Јанева, која му кажала на лице од кабинетот задолжено за одобрување на такви акти. Ѝ го кажав ова на обвинителката на ‘Империја’ Лиле Стефанова, со која во такви околности се согласивме дека сум должна да потпишам и според Законот, не смеам да одбијам, вели Јосифовска.
-Апсолутно на ништо не се посомневав. Во тој момент до мене немаше допрено никакви и најмали индиции или сознанија дека во позадината на сето ова стои нешто криминално. Не знам ни се уште дали стои, меѓутоа во тој момент немав такви сознанија. Тоа е нејзина одлука изготвена по нејзин налог, јас технички сум ја потпишала под нејзиното име и ние како помошници на специјалниот јавен обвинител не можеме да ги менуваме нејзините одлуки, вели Јосифовска.