Украинскиот претседател Виктор Јанукович во последна минута ги блокираше обидите на ЕУ за потпишување на трговскиот договор кој требаше да биде финализиран денес на самитот во Вилинус и кој, јавува Ројтерс, ќе беше историско свртување на Украина од Русија.
По третиот самит на Источното партнерство помеѓу ЕУ и шесте екс советски републики – Украина, Грузија, Молдавија, Белорусија, Еременија и Азербејџан – резултатот за ЕУ не е многу позитивен. ЕУ потпиша два договори за асоцијација со Грузија и Молдавија и договор олеснување на визниот режим со Азербејџан. Но не дојде до потпишување на договор со Киев со кој односите во последните месеци се затегнати.
«Украинскиот претседател не е подготвен да оди подалеку кон интеграцијата со ЕУ», изјави летонската претседателка Далиа Грибаускаите која беше домаќин на самитот во Вилниус. Таа исто така го обвини украинското раководство дека избрале «пат кој не води никаде».
Германската канцеларка Ангела Меркел и францускиот претседател Франсоа Олан за прекинот на преговори ја обвинија Украина но додадоа дека вратата на ЕУ пазарот останува отворена.
Јанукович од своја страна изјави дека и понатаму има намера да го потпише договорот за асоцијација со ЕУ во иднина бидејќи неговата земја има потреба од финансиска помош. Поранешната понуда на ЕУ за 600 милиони евра Јанукович ја нарече «понижувачка». На самитот во Вилниус тој ги наброја економските потреби на Украина и додаде дека цените на гасот што неговата земја треба да и ги плати на Русија се високи. Меркел рече дека Европа ќе и даде гас на Украина, која е зависна од руското снабдување, иако способноста на Европа тоа да го прави во долг период се лимитирани.
На редицата средби на Јанукович со европските лидери тој бараше трилатерален договор помеѓу Москва, Киев и Брисел но ЕУ инсистираше дека тоа не е можно бидејќи асоцијативните договори се билатерални.
Јанукович има за цел да ја модернизира Украина и да овозможи подобар живот за 46те милиони жители на земјата а договорот со ЕУ за оваа земја ќе го отвореше широкиот европски пазар.
Но Киев е зависен од Русија за извозот и снабдувањето со гас па соочен со барањата на Москва одлучи засега да не го потпишува договорот со ЕУ.
Освен тоа, Брисел од Киев бара реформи во судството а еден од европските услови е и пуштањето на слобода на Јулија Тимошенко. Украинскиот парламент требаше да усвои закон со кој Тимошенко ќе можеше да биде ослободена но ова ветување не беше исполнето. Самата Тимошенко од затворот побара од Европа да го потпише договорот со Киев без услови за да и помогне на земјата.
Денешниот неуспех ја предизвика лутината на проевропската опозиција која протестира веќе неколку дена. «Бараме промени, сакаме да живееме со европското семејство, со европски правила и европски стандард», вели Витали Кличко, еден од шефовите на опозицијата.
Финалниот заклучок на ЕУ од самитот во Вилниус ја подвлекува огромната поддршка на граѓаните на Украина за политичка и економска интеграција со ЕУ.
ЕУ тврди дека договорот за асоцијација е се уште на маса и дека може да биде потпишан и во февруари 2014 година на самитот помеѓу ЕУ и Украина.
видео: TheWorldNews247
Фотографија: Ројтерс-Васили Федошенко