Грчкиот амбасадор при ЕУ Теодорос Сотиропулос, запрашан зошто се подготвува да ја блокира Македонија и покрај петтата препорака за старт на преговори за членство, изјави во Брисел дека знае за препораката на Европската комисија.
Според амбасадорот проширувањето е дел од надлежностите на Советот на ЕУ а “тој Совет минатата година многу многу јасно ги утврди условите според кои вашата земја може да оди напред”, рече тој одговарајќи на прашање на македонски дипломат.
Грција, вели тој “е проевропски настроена и тоа е нејзина стратегиска определба” и сака да има соседи кои се исто така европски настроени. “Од 1999 година Грција е исто така за европската перспектива на Турција но сите наши соседи треба да го исполнат она што е неопходно”, рече тој.
“Ние сме подготвени и грчкото претседателство ќе го поддржува проширувањето на неутрален начин за сите кандидати за членство и ќе бидеме среќни кога ќе се создадат услови нашите соседи на напредуваат кон ЕУ”, рече Сотиропулос.
Сепак, проширувањето нема да биде помеѓу главните приоритети на Грција кога оваа земја ќе седне во фотелјата на престедавач на ЕУ на 1 јануари 2014 година.
Во текот на шесте месеци од грчкото претседавање ќе има настани во Грција врзани за Западниот Балкан а еден од нив, заедно со Европската комисија, разледувањето на делувањето на балканските влади и инвестициите во земјите од регионот.
Според амбасадорот тоа е уште еден доказ дека влезот на нови членки е еден од грчките приоритети и тој се надева дека ќе има позитивни чекори за Србија или за време на крајот на летонското претседателство или на почетокот на грчкото.