Две недели на Семинар за кинеска традиционална медицина во Кина. Група од 16 луѓе лекари, физијатри, фармацевти , невролози, реуматолози, педијатар, но и двајца државни службеници во Министерството за здравство, две недели ќе учат како да ја применуваат кинеската традиционална медицина во Македонија.
Како што дознава НОВА, на двонеделниот семинар за Кинеска традиционална медицина и здравствен систем се обучуваат Владимир Милошев , државен секретар во Министерството за здравство, Сузана Маневска раководител за болничка дејност во Министерството за здравство, но и неколку директори на јавни здравствени установи, како Ангелчо Андовски директор на Институтот за белодробни заболувања кај децата во Козле, Маја Манолева директорка на Заводот за физикална медицина и рехабилитација во Козле . Во Кина отпатувале и претставници од Медицински факултет во Штип, од Центарот за традиционална медицина, двајца анестезиолози од ГОБ „8 Септември“, физијатар и клинички фармацевт од Специјалната болница за геријатрија, лекари од Клиниките за неврологија и ревматологија.
На ова егзотично патување тимот од 16 луѓе во здравството отпатувале на покана на Владата на НР Кина, а преку Секретаријатот за европски прашања.
„ Во рамки на билатералната соработка меѓу Република Северна Македонија и Народна Република Кина, на иницијатива на Секретаријатот за европски прашања, овозможено е спроведување билатерален семинар во близина на Пекинг, Кина, во времетраење од две недели. На семинарот станува збор за традиционална кинеска медицина и здравствена заштита прилагодено за РС Македонија. Делегацијата е составена од 16 учесници, при што трошоците за спроведување на семинарот се покриени од страна на Владата на Народна Република Кина, вклучително и трошоците за меѓународниот лет на учесниците“, се вели во одговорот на Министерството за здравство.
Од таму објаснуваат дека учесниците се номинирани од повеќе здравствени институции кои, како што велат, „на овој семинар имаат можност да го надградат своето знаење и вештини од областа на источната медицина и традиционалната кинеска медицина“.
„Организатор на семинарот е Меѓународниот Центар од провинцијата Shanxi за здравство и семејно планирање. Знаењето од овој семинар експертите ќе го применат пред се во своите здравствени институции, каде ќе можат да воведат нови алтернативни методи за лекување и советување, како и за развој на Центарот за традиционална кинеска медицина кој се наоѓа во Штип“, велат од Министерството за здравство.
Од ресорното Министерство објаснуваат дека на овој семинар од страна на кинеската влада биле поканети и владини службеници вклучени во управување на здравството.
„Од тие причини, делегацијата е предводена од државниот секретар, д-р Владимир Милошев и раководителот на сектор за болничка здравствена заштита, Сузана Маневска. Со оваа посета нашата делегација ќе се запознае со придобивките на традиционалната кинеска медицина и како функционира во рамките на нивниот здравствен систем. Оваа посета е добра паралела за увид во функционирањето на различни здравствени системи и искористувањето на позитивните практики во земјава“, велат од Министерството за здравство.
Каде и на како ќе ги применуваат придобивките од кинеската традиционална медицина во македонските здравствени институции, се очекува Министерството за здравство детално да објасни во наредниот период, по нивното враќањето во земјата.