Своите уметнички творби ги изработува со уста, скромна и дружељубива, Розе и овој пат на Светскиот ден на хендикепот, ја покажа својата хуманост. Заедно со нејзините пријатели, телесни инвалиди организираа групна изложба, а средствата ќе одат за помош во Националниот сојуз на телесни инвалиди „Мобилност Македонија„
Розе Мојсовска од своја десетгодишна возраст е во Заводот за рехабилитација на телесни инвалиди во Бања Банско. На седум години пројавила интерес за сликарството,но, поради нејзиниот телесен хендикеп срамежливо почнала да слика со уста. Розе вели дека се срамела од луѓето во околината дека своите чувства ги изразува преку четката за сликање која ја држела во уста.
Таа е единствена во државата која платното го бои на ваков начин. Учествува на многу ликовни колонии, каде го усовршува својот стил на сликање, има направено многу самостојни и групни изложби. Розе пишува и поезија и има издадено четири збирки, а наскоро ќе излезе и петтата. Розе денеска заедно со нејзините пријатели телесни инвалиди го одбележаа Светскиот ден на хендикеп, со групна изложба,а средствата од продадените дела ќе се слеат во касата на Националниот сојуз за телесни инвалиди„Мобилност Македонија“. Меѓународниот ден на хендикеп се одбележува на различни начини.
Годинава Обединетите нации ја промовираа темата која ќе биде водечка за 2013 година за движењето за права на лицата со хендикеп – „Скршете ги предрасудите – отворете ги вратите“.
Здружението Полио Плус, во рамки на свеченоста на претседавачите од четирите состави кои досега функционираа во македонското Собрание, пратеници од најразлични политички партии, ќе им бидат доделени плакети за постигнатите резултати во борбата за еднаквост на лицата со хендикеп во Македонија.
Полио Плус од декември 2012 година го имплементира овој проект поддржан од Европскиот инструмент за демократија и човекови права. Целта на активностите спроведени со овој проект е да се унапреди системот на вработување на лица со хендикеп во Република Македонија.
Спроведените активности беа во насока да се овозможи целосна инклузија и почитување на човековите права на лицата со хендикеп во општеството и на отворениот пазар на труд согласно Конвенцијата за правата на лицата со хендикеп.