Адвокатите на Катица Јанева денеска почнале со увид во доказите кои ги поседува Обвинителството з агонење организиран криминал против неа во случајот „Рекет“, но ќе продолжат евентулано утре, а најверојатно в понеделник. Увид во доказите правела и лично Јанева, но како што изјавија адвокатите поради куќниот ред на затворот, таа морала да се врати во Шутка, а адвокатите со нејзина согласност продолжиле.
Меѓу доказите кои денеска ги виделе биле и исказите на обвинителите од СЈО Лиле Стефанова и Бурим Рустеми, но не и на второосомничениот во „Рекет“ Зоран Милевски, како што беше случај и вчера при увидот во доказите од страна на адвокатите на првоосомничениот Бојан Јовановски.
Како што рекоа адвокатите на Јанева, за тоа немало образложение, односно обвинителката сметала дека тоа не е нејзина обврска.
Адвокатите на Јанева сметаат дека според праксата на Стразбур сите искази треба да им се дадат на увид. Денеска не стасале да направат увид ниту во ПИ-мерките што биле употребени за Јанева.
Најавија дека ќе продолжат со увидот и следната недела и евентуално ќе поднесат нивни докази.
Надлежниот обвинител од ОЈО за гонење на организиран криминал и корупција Вилма Русковска, на почетокот на неделата, по севкупната анализа на прибраните материјални и вербални докази информираше дека е завршена истражната постапка за „Рекет“ и дека тече рокот од 15 дена за увид во доказите за првоосомничените лица и правото на одбраната да предлага докази во корист на осомничените.
Увид во доказите вчера изврши Бојан Јовановски, кој е првоосомничен во случајот „Рекет“.
Случајот „Рекет“ Обвинителството за организиран криминал и корупција го отвори во јули годинава, против Бојан Јовановски-Боки 13 и Зоран Милевски-Кичеец, за потоа истрагата да се прошири и против Катица Јанева. Јовановски и Јанева се во притвор во Затворот Скоје, а Зоран Милески – Кичеец со одлука на судот од завчера е префрлен во домашен притвор.