Судењето за насилствата пред Општина Центар во јуни 2013 година денеска почна одново поради тоа што изминале 90 дена од одржување на последното рочиште.
Случајот го води судијата Душко Јосифовски, а застапник на обвинението е Фатиме Фетаи.
Обвинителката Фетаи, на почетокот на денешното рочиште, со оглед на тоа, како што рече, дека постапката трае веќе повеќе од три години, побара на обвинетиот Никола Груевски кој подолго време е во бегство да му се суди во отсуство, што Судот го прифати.
Адвокатот Димитар Дангов побара, со оглед дека од последното одржано рочиште поминале повеќе од 90 дена, а и дека треба повторно да бидат изведени докази и сведоци, Судот повторно да процени кои докази се процесно важни и неважни со цел постапката што побрзо да заврши.
Бранителот Дончо Наков, рече дека се приклучува на предлогот и посочи дека со тоа што постапката почнува одново, а има измени во овластениот тужител, кој сега нема право да ги користи снимените разговори како докази, имајќи предвид дека тоа ексклузивно право го имаше единствено Специјалното јавно обвинителство, Судот треба да им дозволи да ги образложат дадените приговори по досега изведените докази.
Судот ги одби нивните предлози за одложување на расправата, за закажување посебно рочиште за образложување на приговорите по изведените докази и за новонастанатата ситуација со оглед на промената на овластениот тужител.
Обвинителката Фетаи кажа дека нема промена на обвинителниот акт и предложи изведените докази и веќе сослушаните сведоци, само да се прочитаат.
Одбраната се спротивстави на таквиот предлог и побара, со оглед на изменетата ситуација Судот да им овозможи да ги испитат сведоците.
Судот одлучи да се читаат исказите на сослушаните сведоци.
Сослушани двајца сведоци
Првиот сведок, која во 2013 до 2017 била советник во Советот на Општина Центар, рече дека на седницата во 2013 година биле четири одлуки за измена на ДУП-от.
– Гласањето на дневниот ред, со оглед дека спорните точки не беа тргнати, се изгласа. По два три часа расправа седницата беше прекината и закажана за четири пет дена. На следната седница додека се расправаше по легитимноста на точката, надвор имаше многу луѓе и врева. Со оглед дека надвор имаше народ што гласно реагираше на постапката за стопирање на градбата на црквата Св. Константин и Елена, внатре не можевме да следиме што се случува. Искрено не знам зошто Претседателот на Советот не ја прекина Седницата, изјави сведокот.
Седницата, посочи таа, не беше прекината и во меѓувреме се случи реакцијата на луѓето надвор, со кршење на прозорци.
– Седницата траеше повеќе од 20 часа и не знам како претседателот на Советот не покажа сенс и не ја прекина со оглед дека немаше услови за работа, истакна сведокот.
Посочи дека не видела никакви политички одбележја кај толпата луѓе пред општината.
Вториот сведок, предложен од Борче Богдановски, рече дека Богдановски го познава од дете и дека тој е голем христијански верник и донатор на Црквата.
– Кога дојде повик од црквата да присуствуваме на протест за црквата Св. Константин и Елена. Поради работни обврски јас бев само еднаш на протест заедно со Богдановски. Имаше многу луѓе со верски одбележја. Таму беше и Митрополит Агатангел кој имаше и обраќање и повика да се продолжи протестот и пред Општина Центар, изјави сведокот.
Посочи дека Богдановски цело време протестирал мирно и се движел заедно со толпата.
Судот врз основа на член 347 од ЗКП ги отфрли и нема да бидат сослушани повеќе предложени сведоци, меѓу кои и Митрополит Агатангел.
Поради економичност на постапката, на денешното рочиште, беа сослушани двајцата веќе повиканите сведоци, предложени од одбраната. Судењето ќе продолжи на 18 ноември.
Во „Насилство во Општина Центар” обвинети се повеќе лица, меѓу кои поранешниот премиер Никола Груевски кој е во бегство во Унгарија, екс министерот за транспорт и врски Миле Јанакиески, како и поранешната советничка од ВМРО-ДПМНЕ Даниела Рангелова и осум други лица.