Професионалци, активисти, средношколци – за активно европско граѓанство

Асоцијацијата за напредок, едукација и лобирање, викендов, во Скопје организираше два еднодневни семинари за активно европско граѓанство за демократија и учество, а во рамките на семинарите спроведе и анкета за перцепцијата на поимот граѓанство и граѓанската улога во демократскиот живот во Македонија.

Целта на двата семинара беше да поттикнат подобро разбирање на поимите граѓанство и европско граѓанство меѓу учесниците, како и да го промовираат граѓанското учество во демократскиот живот.

Помеѓу активностите имаше еден семинар за претставници на невладини организации, политички партии, синдикати и слично, и еден за средношколци:

-Еднодневен семинар во хотелот „Континентал“ за 30 претставници од различни невладини организации, политички партии, синдикати, како и младински и просветни работници кои имаат работилници и дебати за граѓанско образование и истражување на перцепциите за поимот граѓанство и европско граѓанство. Учесниците на работилниците имаа прилика да дискутираат и да се здобијат со повеќе знаење за политиката на ЕУ и активното учество на возрасните и младите во поттикнување на чувство за граѓанство меѓу локалното население.

-Еднодневен семинар во средното угостителско училиште „Лазар Танев“, за 30 ученици од различни средни школи кои имаа креативни неформални работилници за граѓанско оброзование. На работилниците се разговараше за тоа што е граѓанство, граѓанин, права и должности на граѓаните, исторски развиток на граѓанските права.

Проектот „Aктивно европско граѓанство за демократија и учество: Поврзување на ЕУ и Западен Балкан“ е заедничка активност на 6 организации од Македонија (Асоцијација за напредок, едукација и лобирање – НЕЛ), Албанија (Beyond Barriers), Србија (Balkan Idea), Полска (Robert Schuman Foundation), Англија (АSHA Foundation) и Германија (European Intercultural Forum). Проектот е финансиран од програмата „Europe for Citizens“ (Европа за граѓаните) на Европската Комисија, трае 17 месеци и се состои од повеќе активности кои ќе бидат реализирани во Македонија, Србија, Албанија и Германија:

– Првата фаза беше во септември 2013-та кога се одржа состанок за договарање на активностите на проектот во земјите-партнери на проектот во Тирана.

– Втората фаза се еднодневните семинари во Скопје, Тирана и Нови Сад и спроведување на анкетата со која се истражува перцепцијата на поимот граѓанство и граѓанската улога во демократскиот живот во Македонија, Србија и Албанија.

– Третата фаза се регионални состаноци за активисти/младински работници/професионалци во полето на граѓанското образование и политиката на ЕУ, кои ќе бидат одржани во Берлин (учесници од Германија, Англија и Полска) и Скопје (учесници од Македонија, Србија и Албанија) во април 2014-та.

– Последната фаза е финалната конференција во Тирана (во септември 2014-та) за цивилно оброзавание и европско граѓанство, како и за влијанието на политиките на ЕУ во процесот на зајакнување на демократското учество на сегашните и идните граѓани на Европската Унија.