Во Собранието по иницијатива на СДСМ се расправа за законот за материјално обезбедување на невработени лица со кои би требало да се реши долгогодишниот проблем на околу 6.000 стечајци. Еве акценти од дебатата Диневски VS Павлова.
Власта не даде поддршка на комисиската расправа, а опозицијата предлага законски акт кој предвидува тие да добиваат месечен паричен надомест од 6000 денари до пензионирање.
– Основната цел е да се реши проблемот на граѓаните кои останаа без основната егзистенција. Останаа без парче леб, по вина на државата, истакна пратеникот на СДСМ Голупчо Ангелов.
„Треба да направиме се, заеднички да им го решиме проблемот на овие луѓе, коишто верувајте веќе 20 години талкаат од врата до врата, од институција до институција, се со цел да дојдат до парче леб. Не го прифаќајте мислењето на Владата, затоа што не е во право. Селективен е пристапот со законското решение од 2008 година. Согласно Уставот на Република Македонија овие права им следуваат на граѓаните, поточно на стечајците. Можете ли за момент да заборавите дека СДСМ и другите партии во опозиција се предлагачи на ова законско решение. Битно е да се реши проблемот. Напуштете ја суетата, напуштете го партискиот ров“, рече од говорницата Ангелов.
Додека трае дебата внатре во Собранието, надвор пристигнаа 100-тина стечајците кои бараат да биде донесен овој закон кој нив ќе им обезбеди основни егзистенцијални услови.
Тие носат пароли „Спасете ги стечајните работници“, во моментов четворица од нив влегоа во Собранието.
Околу законодавниот дом распоредено е силно полициско обезбедување.
Тие најавуваат дека ќе останат пред Собрание и дека повторно ќе постават шатори ако законот не биде донесен.