Народниот правобранител, Иџет Мемети смета дека постапил правилно што на денот на инцидентите од 24 Декември, веднаш по исфрлањето на новинарите и пратениците од опозицијата, учествувал на седницата за негов реизбор на чело на институцијата Народен правобранител. По соопштението испратено од група активисти за човекови права кои од него бараат оставка поради молчењето за инцидентите од минатиот месец, Мемети за Нова вели дека тој нема намера да ги коментира нивните мислења. Тој лично не се чувстувал одговорен поради присуството на седницата на која беше избран без опозицијата, која беше претходно исфрлена.
“Работа на парламентот е кога ќе го избира омбудсманот, а не работа на кандидатот. Сепак, се рабит за законодавен дом каде тој се бира со двотретинско мнозинство и тоа не е случајно така”, вели Мемети.
Негира дека немало негова реакција за случувањата. Тврди дека постапува по постапката за исфрлањето на новинарите, но, не било во неговиот мандат да се меша во одлуките на претседателот на Собранието. Запрашан дали ќе постапува доколку и пратениците од опозицијата покренат постапка во канцеларијата за прекумерна употреба од страна на полицијата присутна во Собранието одговори дека тоа не е во неговиот мандат.
“Јас веќе постапив, тоа е одлука на претседателот за обезбедување на услови над која јас немам надлежност.
За полицијата зборуваме, не за одлуките на собранието?
Полицијата постапила по одлука на претседател на Собрание и нигде во свет омбусманите немаат надлежност над одлуките на претседателите на Собраниеот. Замислете почитувана госпоѓо новинарко, омдусманот на Шведска каде што е родена оваа институција да отвори постапка за претседател на парламентот на Шведска.”, вели Мемети за Нова.
Групата активисти за човекови права во отвореното писмо до Народниот правобранител го оспоруваат неговиот мандат и му забележуваат што дозволил токму на денот кога се кршеле човековите права, Мемети да премолчи и да присуствува на таа седница.
Истиот ден беа кршени и човековите права на голема група протестанти од страна на полицијата, која го оневозможуваше правото на мирен протест (со селективно запирање на автобуси), со прекумерна употреба на сила, и со неспречување на насилство.
-Истиот ден беа повеќекратно газени Уставот, Законот за Собрание и собранискиот деловник, а газењето на демократските процедури се одвиваше пред вашите очи” се вели во отвореното писмо од активистите за човекови права Жарко Трајаноски, Уранија Пировска, Рамадан Рамадани, Џабир Мемеди-Дерала и Роберто Беличанец .