Извори кои ја познаваат проблематиката за НОВА велат дека стоковите резерви постојано се обновуваат и нелогично е тие да биле стари, од 2016 година како што тврдат надлежните
Инсулините кои се уништени се од паралелен увоз и се набавени со тендерот од 2016 година, тврдат за НОВА, во Агенцијата за лекови (МАЛМЕД). Од таму потенцираат дека законските измени во делот на паралелниот увоз налагаат повисоки стандарди за квалитет кои треба да се исполнат при ставање на секој лек во промет.
„Станува збор за инсулини кои се чувале во веледрогеријата „Зегин“ и се дел од државните стокови резерви. Инсулините се од производителот „Новонордиск“ и се набавени со тендерска постпка спроведена од Министерството за здравство во 2016 година. Поголема количина од овие инсулини се со рок пред истекот на важноста. Сите инсулини се увезени согласно одредби кои биле пропишани во Законот за лекови и медицински помагала но, истите не се повеќе во важност. Законските измени во делот на паралелен увоз предвидуваат повисоки барања и стандарди за потврдување на квалитетот на лековите кои е потребно да се исполнат при ставање на секоја серија на лек на пазарот“, велат за НОВА од Агенцијата за лекови(МАЛМЕД).
Сепак, од суштинско значење по уништувањето на оваа количина на инсулини е дали во државните стокови резерви има доволно инсулини, за колку време и колкава количина. Како ќе се надополнат стоковите резерви кои се неопходни во случај на вонредна состојба, еколошка катастрофа, елементарна непогода или при поголемо нарушување на пазарот, дали за тоа ќе биде потребен нов тендер за кој се знае дека процедурата трае подолго.
Од Министерството за здравство велат дека нов тендер нема да биде распишан бидејќи дел од инсулините од последниот двегодишен тендер ќе бидат насочени кон стоковите резерви.
„Нема да има нов тендер за инсулини, дел од последната набавка ќе оди во стоковите резерви. Инсулинот кој што е уништен е од стоковите резерви и е увезен со постапка на паралелен увоз во претходната Влада, пред стапување на сила на одредбите од Законот за изменување и дополнување на Законот за лекови и медицинските средства („Службен Весник на Република Македонија, број 113/2018). Поради тоа што инсулинот повеќе не одговара на сега пропишаните одредби во Законот за лекови и медицински средства, Владата донесе одлука истиот да се отпише и соодветно да се уништи, а потребите во Стоковите резерви согласно Програмата за стокови резерви соодветно да се надополнат“, се вели во одговорот за НОВА, од Министерството за здравство.
Сепак, нејасно дали количината инсулини предвидена со двегодишниот тендер ќе биде исцрпена со префрлање на дел од нив во стоковите резерви. Дали постои опасност од недостиг на инсулини без да се трошат стоковите резерви и како тоа ќе се реши.
Извори кои ја познаваат проблематиката ја потенцираат дилемата за тоа дали воопшто биле стари уништените инсулини. Тие за НОВА објаснуваат дека уништените инсулини биле од два добавувачи, а биле чувани во фрижидерите на „Зегин“како стокови резерви. Од причина што една година бил истечен договорот со Министерството за здравство за чување на инсулините, од „Зегин“(каде бесплатно ги чувале цела година) повеќе пати барале да бидат отстранети инсулините од кај нив. Но, потенцираат дека според законската процедура лековите од стоковите резерви постојано се обновуваат.
“Од причина што количината мора постојано да се обновува, тие не можат да бидат постари од 12 месеци и нелогично е инсулините да биле со стари рокови како што се тврди. Стоковите резерви постојано се заменуваат и нема можност да бидат пред истек на рокот или од пред 3 години, односно од 2016 година“. посочуваат извор за НОВА, кои се упатени во оваа проблематика.
Препукувањата на релација ВМРО ДПМНЕ и здравствените власти траат неколку дена, откако опозицијата излезе со прес конференција на која обвинија дека на 5 декември бил уништен инсулин во вредност од 1,5 милиони евра, шест месеци пред истекот на рокот.
По ова, Основното јавно обвинителство за гонење на организиран криминал и корупција вчера најави дека ќе го проверува случајот со уништените инсулини на Министерството за здравство, дека ќе се проверува потеклото на инсулините и процедурата на нивното уништување.